پرەزيدەنت توقايەۆ ۇكىمەتتىڭ كەڭەيتىلگەن وتىرىسىنا قاتىسىپ، ەل ەكونوميكاسىنىڭ احۋالى مەن الداعى مىندەتتەرگە بايلانىستى ماڭىزدى مالىمدەمە جاساۋدا دەپ حابارلايدى Dalanews.kz.

كەزدەسۋگە پرەمەر-مينيستر ولجاس بەكتەنوۆ، ۇلتتىق بانك ءتوراعاسى، سونداي-اق بىرنەشە وبلىس پەن ءىرى قالالاردىڭ اكىمدەرى كەلىپ، 2024 جىلدىڭ قورىتىندىسى بويىنشا ەسەپ بەرەدى.

وتىرىستىڭ باسىندا مەملەكەت باسشىسى اۋەلى الەمدىك جاعدايدىڭ كۇرت وزگەرىپ جاتقانىن اتاپ ءوتتى. ونىڭ ايتۋىنشا، “جاڭا تەحنولوگيالىق ءداۋىر ادامزاتتىڭ ءومىر ءسۇرۋ داعدىسىن تۇبەگەيلى وزگەرتۋدە”، سوندىقتان قازاقستان دا “جاڭا احۋالعا ساقاداي ساي بولۋعا” مىندەتتى.

“ءبىز ۇكىمەت پەن اكىمدەردىڭ جۇمىسىن، ەڭ الدىمەن، ەكونوميكانىڭ دامۋ كورسەتكىشتەرى مەن ازاماتتاردىڭ ءال-اۋقاتىنا قاراپ باعالايمىز. وسى جۇمىستىڭ ناتيجەسى بىلتىر قانداي بولدى؟ نەگىزگى مىندەتتەر ورىندالدى ما؟ بىلتىر اتقارىلعان ىستەر، نەگىزگى مىندەتتەر مەن ونىڭ ورىندالۋ دەڭگەيى بۇگىنگى جيىننىڭ باستى تاقىرىبى بولماق”، – دەدى پرەزيدەنت.

پرەمەر-مينيستر ولجاس بەكتەنوۆتىڭ ايتۋىنشا، 2024 جىلعى جالپى ەكونوميكالىق ءوسىم 4،8 پايىزدى قۇراعان. ءبىرقاتار سالادا ىلگەرىلەۋ بايقالعان، اسىرەسە، اۋىل شارۋاشىلىعى 13% وسىممەن ەرەكشەلەنگەن. ەلدىڭ ءتۇرلى وڭىرلەرى اراسىندا ەڭ جوعارى كورسەتكىش سولتۇستىك قازاقستان، قاراعاندى، تۇركىستان وبلىستارى مەن استانا جانە شىمكەنت قالالارىنا تيەسىلى.

پرەمەر-مينيستر مۇناي ءوندىرىسىنىڭ 2،4 ملن تونناعا دەيىنگى قىسقارۋى جالپى ىشكى ءونىمنىڭ وسۋىنە تەرىس ىقپال ەتكەنىن مويىنداۋدا.

بەكتەنوۆ مۇنى “ءىرى كەن ورىندارىنداعى جوندەۋ جۇمىستارى مەن OPEC+ كەلىسىمىنىڭ شەكتەۋلەرىنە” بايلانىستى دەپ ءتۇسىندىردى. ەكونوميكاسى ءالسىز ايماقتار رەتىندە ۇلىتاۋ، اتىراۋ، باتىس قازاقستان مەن جامبىل وبلىسى ايتىلدى.

پرەزيدەنت توقايەۆ پرەمەر-مينيستردىڭ بايانداماسىن تىڭداعاننان كەيىن ۇكىمەتتىڭ الداعى ماقسات-مىندەتتەرىنە توقتالدى.

سيفرلاندىرۋ داۋىرىنە بەيىمدەلۋ، يننوۆاسيالىق تەحنولوگيالاردى ەنگىزۋ جانە ءوندىرىس تيىمدىلىگىن ارتتىرۋ – “مەملەكەتتىڭ باسەكەگە قابىلەتىن نىعايتىپ، تۇراقتى دامۋىنا جول اشاتىن باستى فاكتورلار” ەكەنى باسا ايتىلدى.

سونىمەن قاتار الداعى كەزەڭدە جاستاردى جۇمىسپەن قامتۋ، وڭىرلەردەگى ينفراقۇرىلىم جوبالارىن جانداندىرۋ، الەۋمەتتىك قولداۋ تەتىكتەرىن جەتىلدىرۋ جانە سالىقتىق-بيۋدجەتتىك ساياساتتى وڭتايلاندىرۋ ماسەلەلەرى نازاردا بولماق.

كەڭەيتىلگەن جيىن سوڭىندا ۆيسە-پرەمەر سەرىك جۇمانعارين، ەنەرگەتيكا ءمينيسترى الماسادام ساتقالييەۆ پەن قارجى ءمينيسترى ءمادي تاكييەۆ باسپا ءسوز وكىلدەرىنە ارنايى بريفينگ وتكىزەدى دەپ جوسپارلانۋدا. جۋرناليستەر مۇناي وندىرىسىندەگى وزگەرىستەر، بيۋدجەتتىڭ كىرىس-شىعىس بالانسى جانە كەلەر جىلعا ارنالعان ەكونوميكالىق ستراتەگيا تۋرالى ناقتى مالىمەتتەردى وسى باسپا ءسوز ءماسليحاتىنان كۇتەدى.