Májilis depýtaty Abzal Quspan otandyq jas sportshylardy qoldaýǵa qatysty másele kóterdi, - dep habarlaıdy Dalanews.kz.
"Qazir ulttyq quramamyzda Qazaqstannyń azamattyǵyn alyp alǵan sheteldik legıonerler jetip artylady. Biraq olardyń jetken jetistikteri aýyz toltyryp aıtarlyqtaı emes. Olarǵa kelgen kezde Úkimet aqshany da úıip tókti, azamattyqty da jyldam ári tez alyp berdi. Biraq Parıj olımpıadasynyń aldynda Qazaqstannyń azamattyǵyn alyp alǵan eki birdeı tenısshi eń mańyzdy sátte jarysqa qatysýdan bas tartqanyn da bilemiz. Bul eldiń narazylyǵyn týdyrdy. Bolashaq jas sportshylarymyzdyń jolyn kestirmeıtin osyndaı atletterden Qazaqstan azamattyǵyn alý úshin mınıstrlik tarapynan zańnamada naqty tetikter qarastyrylǵan ba?", - dep surady depýtat Májilistiń jalpy otyrysynda.
Týrızm jáne sport mınıstri Erbol Myrzabosynovtyń sózinshe, búgingi tańdaǵy negizgi maqsat – otandyq mektepti qalyptastyryp, ózimizdiń sportshylardy qoldaý.
"Zań jobasy aıasynda Qazaqstan azamattary bolyp eseptelmeıtin sportshylar búdjet qarajaty men kvazımemlekettik sektor qarjylandyrýǵa tyıym salý kózdelgen. Árıne, biz zań aıasynda azamattyqty alyp, el chempıonattaryna qatysamyn degen shekteý qoıa almaımyz. Biraq biz naqty ár sport túrinen baryp, daıyn sportshylardy elge ákelip jumys istemeımiz. Syrt elden ǵylymı toptardy tartý, ǵylymı ınstıtýttarmen jumys isteý, syrt elden bapkerlik korpýsty jaqsy taldaýdan keıin shaqyryp jumys isteý josparymyzda bar", - dedi vedomstvo basshysy.
