Premer-ministrdiń orynbasary – Ulttyq ekonomika ministri Serik Jumanǵarin baspanany tabiǵi apattardan mindetti saqtandyrý tetigin engizý ideiasynan Úkimet nege bas tartqanyna qatysty túsinikteme berdi, dep jazady Dalanews.kz.
UEM basshysy ár otbasy mundai sheshimdi óz betinshe qabyldaýy kerek dep sanaidy.
"Mindetti deisizder me, onda bul otbasy biýdjetine túsetin turaqty júktemeni bildiredi, ár adam bul jaǵdaida baspanasyn atalǵan qaýip-qaterden saqtandyrý-saqtandyrmaý jaiyn ózi sheshýi kerek....Biz basqa joldy tańdadyq. Buǵan jol bermeý úshin (memleket sý tasqyny saldarynan týyndaityn shyǵyndy jappas úshin) bútin bir baǵdarlama qabyldandy, búgin depýtattar ony talqylap jatyr. Biýdjet kodeksine túzetýler engizildi – sý qoimalaryn, kanaldardy, bógetterdi salý týrasynda. Bul aldaǵy jyldary sý basý qaýpi múldem bolmas úshin jasalady. Adamdardy tabiǵi qaterden qorǵaý kerek, bas salyp saqtandyrýǵa májbúrlemei. Eń durysy, osy bolýy kerek", – deidi Jumanǵarin.
Buǵan deiin Senat Biýdjet kodeksiniń jobasyn Májiliske keri qaitarǵanyn jazǵan edik. Qujatqa senatorlar birqatar ózgerister men túzetýler de engizdi. Sonyń biri sý tasqynyn boldyrmaý sharalary bolyp tabylady.
