Úkimet Aqtaý qalasynyń magistraldy jylý jelilerin rekonstrýktsiialaýǵa qarajat bóldi. Tiisti qaýlyǵa Premer-ministr Oljas Bektenov qol qoidy, dep habarlaidy Dalanews.kz.
Qujat Aqtaý qalasynyń magistraldy jylý jelilerin rekonstrýktsiialaý jobasyn iske asyrý úshin 5 mlrd teńgeni Mańǵystaý oblysynyń biýdjetine maqsatty transfertter túrinde aýdarýdy qarastyrady, dep habarlady 10 qazanda Úkimettiń baspasóz qyzmeti.
Atap aitqanda, bul qarajat jergilikti biýdjetten birlesip qarjylandyrýdy eskere otyryp, jumystyń jalpy qunynyń 10% mólsherinde uzyndyǵy 11,5 shaqyrym eń tozyǵy jetken avtojol ýchaskesin rekonstrýktsiialaýǵa baǵyttalady.
Buǵan deiin merdiger uiym qarajaty esebinen shamamen 11,5 shaqyrym jylý jelisi tartylǵan bolatyn. Jalpy, 2024-2026 jyldary aralyǵynda tozý deńgeii 75%-dan asatyn 44 shaqyrym magistraldy jylý qubyryn kezeń-kezeńimen aýystyrý qajet.
Aita ketý kerek, Aqtaý qalasy jylý jelileriniń negizgi bóligi 1962 jyldan beri qoldanysta. Jalpy Aqtaý qalasynda 438 shaqyrym jylý jelisiniń 72% tozyǵy jetken. 464 shaqyrym sý jelisi bar, onyń 88% tozyǵy jetken.
Qabyldanǵan sharalar nátijesinde jelilerdiń tozý deńgeii tómendetilip, turǵyndarǵa sapaly kommýnaldyq qyzmetter kórsetýge jáne jylytý maýsymynyń úzdiksiz ótýin qamtamasyz etýge múmkindik beredi.
