Qazaqstanda biylǵy egis kólemi 23,8 mln gektarǵa jetip, ótken jylmen salystyrǵanda 180 myń gektarǵa artty, dep habarlaidy dalanews.kz.
Úkimet otyrysynda aýyl sharýashylyǵy vitse-ministri Azat Sultanov biyl agrosektorda joǵary rentabeldi daqyldarǵa erekshe basymdyq berilgenin aitty. Sonyń nátijesinde maily daqyldardyń kólemi 4 mln gektardan asyp, mal azyqtyq daqyldardyń alqaby 3,3 mln gektarǵa deiin ulǵaimaq.
Ministrliktiń málimetinshe, júgeri alqaby da 265 myń gektarǵa deiin kóbeitiledi. Bul jańa qaita óńdeý jobalaryn shikizatpen qamtamasyz etýge múmkindik beredi. Sonymen qatar ishki naryqty áleýmettik mańyzy bar azyq-túlikpen qamtý úshin kartop alqaptaryn 10 myń gektarǵa ulǵaitý josparlanǵan.
Úkimet egis alqaptaryn ártaraptandyrý jumystaryn da jalǵastyryp jatyr. Biyl dándi daqyldardyń kólemi qysqaryp, onyń ishinde bidai alqaby 12,1 mln gektardy quraidy. Bul aýyl sharýashylyǵyn naryq suranysyna jáne sý resýrstaryn tiimdi paidalanýǵa beiimdeýge baǵyttalǵan.
Sý únemdeý tehnologiialaryna da erekshe nazar aýdarylýda. Respýblika boiynsha kúrish alqaby qysqartylyp, maqta ósirýde tamshylatyp sýarý kólemi ulǵaitylyp jatyr.
Qazirgi ýaqytta kóktemgi egis jumystary eldiń barlyq óńirinde bastalǵan. Úkimet biylǵy naýqandy ýaqytyly ári sapaly ótkizý máselesin erekshe baqylaýda ustap otyr.
