Qazaqstanda kóktemgi egis jáne egin jinaý jumystaryna bólinetin qarjy kólemi aitarlyqtai artty, dep habarlaidy dalanews.kz.
Úkimet otyrysynda «Báiterek» ulttyq basqarýshy holdinginiń basqarma tóraǵasy Rýstam Qaraǵoishin biyl kóktemgi egin egý jáne jinaý jumystaryna keminde 750 mlrd teńge baǵyttalatynyn málimdedi. Bul 2023 jylǵy kórsetkishten bes ese kóp.
Onyń aitýynsha, erte nesieleý tetikteri men kepildik berý quraldaryn engizý diqandardy qoldaý kólemin edáýir arttyrýǵa múmkindik bergen. «Keń dala 2» baǵdarlamasy aiasynda fermerlerge qarjy 18 aiǵa deiingi merzimge jyldyq 5% mólsherlememen beriledi.
Qazirgi ýaqytta nesieleýdiń jalpy somasy 534 mlrd teńgeden asqan. Jeńildetilgen qaryzdardy 6,4 mln gektardan astam alqapqa egin egip otyrǵan 4,2 myń aýyl sharýashylyǵy taýaryn óndirýshi alǵan.
Rýstam Qaraǵoishin kepil tapshylyǵy máselesin sheshý úshin «Damý» qorynyń kepildik berý quraly belsendi qoldanylyp jatqanyn aitty. Búgingi kúnge deiin jalpy somasy 209 mlrd teńgege 1,5 myń kepildik berilgen. Bul qural nesie somasynyń 85%-yna deiin jabady.
Sonymen qatar «QazAgroQarjy» arqyly aýyl sharýashylyǵy tehnikasyn jeńildikpen lizingke berý jalǵasyp jatyr. Baǵdarlama aiasynda tehnika jyldyq 5% mólsherlememen rásimdeledi.
Jyl basynan beri fermerlerge 180 mlrd teńgeden astam somaǵa 5 myńnan asa aýyl sharýashylyǵy tehnikasy berilgen. Onyń 90%-y Qazaqstanda óndirilgen tehnika ekeni aityldy.
Úkimet otyrysynda premer-ministr Oljas Bektenov buryn berilgen nesielerdiń qaitarylýyn baqylaýda ustaýdy tapsyrdy.
«Muny da baqylaýda ustaý kerek, áitpese biz jyl saiyn qarajat bere almaimyz. Qarjylandyrýdyń mundai qomaqty kólemi negizinen revolverlik mehanizm boiynsha berilýi tiis: aldymen qarajat qaitarylady, sodan keiin qaitadan beriledi», — dedi premer-ministr.
