2026 jyldyń 1 aqpanyna deiin kámeletke tolmaǵan balalardyń esepshottaryna "Ulttyq qor – balalarǵa" baǵdarlamasy boiynsha úshinshi tólem aýdarylady. Bul týraly Biryńǵai jinaqtaýshy zeinetaqy qory málimdedi, dep habarlaidy Dalanews.kz.
"Atalǵan tólemdi 2025 jyldyń 31 jeltoqsanyna deiin 18 jasqa tolmaǵan Qazaqstan Respýblikasynyń barlyq azamaty alady. Sonymen qatar 2008 jyly týǵan jáne 2026 jyly 18 jasqa tolatyn balalarǵa arnalǵan maqsatty jinaqtar da 1 aqpanǵa deiin olardyń arnaiy jinaq shottaryna aýdarylady", - dedi BJZQ.
Tólemniń naqty somasy ázirge anyqtalmaǵan. BJZQ málimetinshe, bir balaǵa 2026 jylǵa esepteletin tólem mólsheri Qazaqstandaǵy kámeletke tolmaǵan balalar sany men Ulttyq bank bergen málimetterge súiene otyryp, Ulttyq qordan balalarǵa esepteletin jalpy qarajat kóleminen esepteledi.
Mysaly, 2024 jyly balalarǵa tólem 100,52 dollar, al 2025 jyly 129,38 dollar kóleminde aýdarylǵan. Jyl saiynǵy tólem mólsheri tikelei Ulttyq qordyń valiýtalyq aktivteri men investitsiialyq kirisine bailanysty. Tólemder qordyń uzaq merzimdi investitsiialyq kirisiniń jartysynan formalanady.
Aýdarylǵan qarajatty tek bilim alý jáne 18 jasqa tolǵannan keiin turǵyn úi jaǵdaiyn jaqsartý maqsatynda paidalanýǵa bolady. Erte alý nemese qarajatty basqa maqsatqa jumsaý múmkin emes.
Sondai-aq 2024 jyldyń 1 aqpanynan 2025 jyldyń 1 jeltoqsanyna deiin BJZQ 188 myńnan astam ótinishti oryndap, jalpy 28,25 mln dollar somasyn balalardyń esepshottaryna aýdarǵan. Onyń ishinde 17,6 mln dollar turǵyn úi jaǵdaiyn jaqsartýǵa, al 10,65 mln dollar oqý aqysyn tóleýge baǵyttalǵan.
