Aqtaýda qaza tapqan 29 jastaǵy Alina esimdi arýdyń oqiǵasy qoǵamda úlken rezonans týdyrdy. 2024 jyly mamyrda oǵan birneshe er adam shabýyl jasap, zorlyq-zombylyq kórsetken. Saldarynan boijetken ózine qol jumsaǵan. Sot barysynda aiyptalýshylardyń kinási dáleldenip, olar ártúrli merzimge sottaldy. Alaida marqumnyń týystary sot úkimimen kelispei, apelliatsiiaǵa shaǵym túsirdi, dep habarlaidy Dalanews.kz.
Alinanyń týystarynyń aitýynsha, birneshe er adam ony kólikke kúshtep otyrǵyzyp, uryp-soǵyp, nesie alýǵa májbúrlegen. Qylmyskerler ony bosatpas buryn “bizdi bireýge aitsań, óltiremiz” dep ses kórsetken. Qatty qoryqqan Alina úiinen ketip, qurbysynyń páterin panalaǵan. Jaǵdaidy otbasyna aitýǵa uialyp, birneshe kúnnen keiin toǵyzynshy qabattan sekirip, ómirimen qosh aitysqan.
Sot otyrysy barysynda basty aiyptalýshynyń aýyr qylmysqa qatysy bary dáleldengenimen, keibir aiyptaý baptary sot barysynda eskerýsiz qalǵan. Nátijesinde, negizgi aiyptalýshy 20 jylǵa, al qalǵan tórteýi 7-8 jylǵa bas bostandyǵynan aiyrylǵan.
Marqumnyń sińlisi Arailym Ulysmedia agenttigine jaǵdaidy baiandap berdi. Onyń aitýynsha, sotta aiyptalýshylardyń tórteýi kinásin moiyndaǵan, biraq basty aiyptalýshy S. óziniń qylmysyn joqqa shyǵarǵan. Alaida Alina tiri kezinde dál sol adam zorlaǵanyn aityp ketken.
“S. ápkeme: “Tórteýi jabylady, odan da menimen bol” dep qorqytqan. Osyndai sumdyqty moiyndasa da, jeńil jazamen qutylyp ketti”, – deidi Arailym.
Týystary sot barysynda kóptegen mańyzdy baptardyń eskerýsiz qalǵanyn aitady. “Esirtki taratý” jáne “adam urlaý” boiynsha baptar bastapqyda aiyptaý aktisinde bolǵan, biraq keiin alyp tastalǵan. Sonymen qatar, beinebaqylaý jazbalaryn joiýǵa árekettengen taǵy bir qatysýshynyń isi de nazardan tys qalǵan.
“Aiyptalýshylar úkim shyǵarar aldynda dúnie-múlkin satyp, 60 million teńge jinapty. Bizde barlyq aiǵaq bar edi: video, kýágerlerdiń sózderi, kináni moiyndaý derekteri. Biraq sot úkimi jeńil boldy. Sot ádil ótedi dep sengen edik, biraq aqyr sońynda ózimiz aqparat tarattyq”, – deidi Arailym.
Bul iske bailanysty negizgi aiyptalýshy 20 jylǵa, qalǵan tórteýi 7-8 jylǵa sottaldy. Alaida jábirlenýshi jaq pen prokýratýra sot sheshimine narazylyq bildirip, apelliatsiialyq shaǵym túsirdi.
Eske salaiyq, buǵan deiin nemolchikz_official áleýmettik jelide 2024 jyldyń mamyr aiynda Aqtaýda bolǵan jantúrshigerlik oqiǵany jariialaǵan edi.
14 mamyr kúni túnde Aqtaýda bir top er adam sportpen ainalysyp, fitnes-jattyqtyrýshy bolyp jumys istegen qyzdy kólikke kúshtep otyrǵyzyp, mefedron berip zorlaǵan. Tańǵa deiin qyzdy qinap, qala berdi telefony arqyly 2 mln teńge kóleminde nesie rásimdegen. Qyzdyń týystary sot sheshimine qarsy shaǵym túsirip, istiń ádil qaralýyn surady.
Prokýror bas zorlaýshyǵa ómir boiyna bas bostandyǵynan aiyrý jazasyn suraǵan, al qalǵan tórteýine 15-16 jylǵa deiin jaza taǵaiyndalýy tiis bolatyn. Prokýratýra olardy zorlaý, jynystyq zorlyq-zombylyq, ózin-ózi óltirýge deiin jetkizý, esirtki zattaryn qoldanýǵa kóndirý, zańsyz bas bostandyǵynan aiyrý jáne adam urlaý, bopsalaý boiynsha aiyptaǵan. Alaida sýdia qyzdyń ólimin zorlyqpen bailanystyrmaǵan. Osylaisha qylmyskerlerdiń jazasyn jeńildetken. Marqumnyń otbasy bul sheshimge apelliatsiialyq shaǵym túsirdi.
