Óskemendik Serikjan Ahmetjanov Úkimetke qarsy shaǵym túsirdi. Ol ýaqytty ózgertý týraly sheshimdi zańsyz dep tanyp, kúshin joiýdy talap etti, - dep habarlaidy Dalanews.kz Tengrinews.kz-ke siltep.
Ol týǵanynan beri Óskemende turatynyn aitady. Ahmetjanovtyń sózinshe, sotqa shaǵymdanýynyń basty sebebi - balalarynyń sabaqtan úige qarańǵyda, kún batqanda oralýy.
"Balalarym ekinshi aýysymda oqidy. Mektepke 13:00-14:00-de barady, al sabaǵy saǵat 19:30-da aiaqtalady. Jinalyp shyǵamyn degenshe saǵat 20:00 bolady. Al Óskemende naqty ýaqyttan eki saǵatqa artyq. Iaǵni saǵat 20:00 bolǵanda, demek saǵat 22:00. Túnde úige kelgen soń, keshki as iship, úi tapsyrmasyn oryndaýy kerek", - dedi ol.
Búginde er adam balalaryn mektepten ózi alyp ketýge májbúr, óitkeni ol olardyń qaýipsizdigi qatty alańdaidy.
"Balalardy ózim alyp ketýim kerek, óitkeni bizdiń mekteptiń qasynda jaryq joq. Kez kelgen adam zańsyzdyq jasai alady. Al bala mundai adamnyń betin de, kiimin de kórmeidi. Sondai-aq, joldarda kólik pen shuńqyr kóp", - dedi ol.
Ahmetjanovtyń aitýynsha, saǵat beldeýiniń ózgerýi azamattarǵa aitarlyqtai qolaisyzdyqtar týǵyzyp, naqty ýaqytpen sáikes kelmeidi. Osyǵan bailanysty ol Qazaqstan aýmaǵyndaǵy ýaqytty esepteý tártibi týraly 2000 jylǵy Úkimet qaýlysynyń kúshin joiýdy talap etip, sotqa júgingen. Óskemendik turǵynnyń aitýynsha, ýaqytty ózgertý týraly qaýlyda úkimetke osy normativtik aktini qabyldaý quziretin beretin naqty zańǵa silteme joq.
"Zańda Qazaqstan aýmaǵyndaǵy ýaqytty esepteý tártibin úkimet aiqyndaityny anyq kórsetilýi kerek. Alaida elimizde mundai zań joq. Onyń ornyna qaýlyda "ákimshilik-aýmaqtyq qurylymdy retke keltirý maqsatynda" qabyldanyp jatqany aitylǵan. Biraq ákimshilik-aýmaqtyq qurylym týraly zańda úkimettiń ýaqytty ózgertý nemese mundai qaýlylardy qabyldaý ókilettigi qarastyrylmaǵan. Konstitýtsiiada búkil el boiynsha ýaqytty anyqtaý máselelerinde úkimettiń ókilettikteri týraly aitylmaǵan. Onda tek Parlament – zań shyǵarý arqyly – nemese Prezident halyq atynan áreket ete alady delingen. Prezidenttiń jarlyǵy da, tiisti zańdar da bolǵan joq. Parlament depýtattary úkimetke osyndai ókilettik berip, arnaiy zań shyǵarýy nemese qoldanystaǵysyna ózgertýler engizýi kerek edi", - dep túsindirdi ol.
Onyń aitýynsha, qaýly halyqtyń pikirin eskermei qabyldanǵan. Óńir turǵyny jazdyń basyna qarai 50 myń qol jinaǵan "Ýaqytty keri qaitarý" týraly petitsiiany mysalǵa keltirdi.
Er adam bul úkim naqty ǵylymi zertteýlerge nemese sarapshylardyń pikirlerine negizdelmegenin alǵa tartady.
"Bilik tabiǵat zańdarynan qalai joǵary bolýy múmkin? Olar ne aitsa da, qandai ǵylymi zertteý jasadym dese de tabiǵatqa qaishy kele almaidy", - dep túiindedi ol.
Qazaqstandyqtyń aitýynsha, sot azamattyq is qozǵap, oǵan Saýda jáne integratsiia ministrligi men onyń Tehnikalyq retteý jáne metrologiia komiteti tartylǵan.
Astana sotynyń baspasóz qyzmeti bul is azamattyq sotqa jiberilgenin, biraq sot otyrysy áli belgilenbegenin aitty.
