وسكەمەندىك سەرىكجان احمەتجانوۆ ۇكىمەتكە قارسى شاعىم ءتۇسىردى. ول ۋاقىتتى وزگەرتۋ تۋرالى شەشىمدى زاڭسىز دەپ تانىپ، كۇشىن جويۋدى تالاپ ەتتى، - دەپ حابارلايدى Dalanews.kz Tengrinews.kz-كە سىلتەپ.

ول تۋعانىنان بەرى وسكەمەندە تۇراتىنىن ايتادى. احمەتجانوۆتىڭ سوزىنشە، سوتقا شاعىمدانۋىنىڭ باستى سەبەبى - بالالارىنىڭ ساباقتان ۇيگە قاراڭعىدا، كۇن باتقاندا ورالۋى.

"بالالارىم ەكىنشى اۋىسىمدا وقيدى. مەكتەپكە 13:00-14:00-دە بارادى، ال ساباعى ساعات 19:30-دا اياقتالادى. جينالىپ شىعامىن دەگەنشە ساعات 20:00 بولادى. ال وسكەمەندە ناقتى ۋاقىتتان ەكى ساعاتقا ارتىق. ياعني ساعات 20:00 بولعاندا، دەمەك ساعات 22:00. تۇندە ۇيگە كەلگەن سوڭ، كەشكى اس ءىشىپ، ءۇي تاپسىرماسىن ورىنداۋى كەرەك"، - دەدى ول.

بۇگىندە ەر ادام بالالارىن مەكتەپتەن ءوزى الىپ كەتۋگە ءماجبۇر، ويتكەنى ول ولاردىڭ قاۋىپسىزدىگى قاتتى الاڭدايدى.

"بالالاردى ءوزىم الىپ كەتۋىم كەرەك، ويتكەنى ءبىزدىڭ مەكتەپتىڭ قاسىندا جارىق جوق. كەز كەلگەن ادام زاڭسىزدىق جاساي الادى. ال بالا مۇنداي ادامنىڭ بەتىن دە، كيىمىن دە كورمەيدى. سونداي-اق، جولداردا كولىك پەن شۇڭقىر كوپ"، - دەدى ول.

احمەتجانوۆتىڭ ايتۋىنشا، ساعات بەلدەۋىنىڭ وزگەرۋى ازاماتتارعا ايتارلىقتاي قولايسىزدىقتار تۋعىزىپ، ناقتى ۋاقىتپەن سايكەس كەلمەيدى. وسىعان بايلانىستى ول قازاقستان اۋماعىنداعى ۋاقىتتى ەسەپتەۋ ءتارتىبى تۋرالى 2000 جىلعى ۇكىمەت قاۋلىسىنىڭ كۇشىن جويۋدى تالاپ ەتىپ، سوتقا جۇگىنگەن. وسكەمەندىك تۇرعىننىڭ ايتۋىنشا، ۋاقىتتى وزگەرتۋ تۋرالى قاۋلىدا ۇكىمەتكە وسى نورماتيۆتىك اكتىنى قابىلداۋ قۇزىرەتىن بەرەتىن ناقتى زاڭعا سىلتەمە جوق.

"زاڭدا قازاقستان اۋماعىنداعى ۋاقىتتى ەسەپتەۋ ءتارتىبىن ۇكىمەت ايقىندايتىنى انىق كورسەتىلۋى كەرەك. الايدا ەلىمىزدە مۇنداي زاڭ جوق. ونىڭ ورنىنا قاۋلىدا "اكىمشىلىك-اۋماقتىق قۇرىلىمدى رەتكە كەلتىرۋ ماقساتىندا" قابىلدانىپ جاتقانى ايتىلعان. ءبىراق اكىمشىلىك-اۋماقتىق قۇرىلىم تۋرالى زاڭدا ۇكىمەتتىڭ ۋاقىتتى وزگەرتۋ نەمەسە مۇنداي قاۋلىلاردى قابىلداۋ وكىلەتتىگى قاراستىرىلماعان. كونستيتۋسيادا بۇكىل ەل بويىنشا ۋاقىتتى انىقتاۋ ماسەلەلەرىندە ۇكىمەتتىڭ وكىلەتتىكتەرى تۋرالى ايتىلماعان. وندا تەك پارلامەنت – زاڭ شىعارۋ ارقىلى – نەمەسە پرەزيدەنت حالىق اتىنان ارەكەت ەتە الادى دەلىنگەن. پرەزيدەنتتىڭ جارلىعى دا، ءتيىستى زاڭدار دا بولعان جوق. پارلامەنت دەپۋتاتتارى ۇكىمەتكە وسىنداي وكىلەتتىك بەرىپ، ارنايى زاڭ شىعارۋى نەمەسە قولدانىستاعىسىنا وزگەرتۋلەر ەنگىزۋى كەرەك ەدى"، - دەپ ءتۇسىندىردى ول.

ونىڭ ايتۋىنشا، قاۋلى حالىقتىڭ پىكىرىن ەسكەرمەي قابىلدانعان. ءوڭىر تۇرعىنى جازدىڭ باسىنا قاراي 50 مىڭ قول جيناعان "ۋاقىتتى كەرى قايتارۋ" تۋرالى پەتيسيانى مىسالعا كەلتىردى.

ەر ادام بۇل ۇكىم ناقتى عىلىمي زەرتتەۋلەرگە نەمەسە ساراپشىلاردىڭ پىكىرلەرىنە نەگىزدەلمەگەنىن العا تارتادى.

"بيلىك تابيعات زاڭدارىنان قالاي جوعارى بولۋى مۇمكىن؟ ولار نە ايتسا دا، قانداي عىلىمي زەرتتەۋ جاسادىم دەسە دە تابيعاتقا قايشى كەلە المايدى"، - دەپ تۇيىندەدى ول.

قازاقستاندىقتىڭ ايتۋىنشا، سوت ازاماتتىق ءىس قوزعاپ، وعان ساۋدا جانە ينتەگراسيا مينيسترلىگى مەن ونىڭ تەحنيكالىق رەتتەۋ جانە مەترولوگيا كوميتەتى تارتىلعان.

استانا سوتىنىڭ باسپا ءسوز قىزمەتى بۇل ءىس ازاماتتىق سوتقا جىبەرىلگەنىن، ءبىراق سوت وتىرىسى ءالى بەلگىلەنبەگەنىن ايتتى.