Ulttyq quryltaidyń besinshi otyrysynda saiasttanýshy Marat Shibutov qurylys kompaniialarynyń jumysyn qatań túrde synǵa aldy, dep habarlaidy Dalanews.kz.
Quryltai múshesiniń aitýynsha, ákimdiktermen jasalǵan kelisimder aiasynda ýáde etilgen áleýmettik nysandardy salmaǵan qurylys kompaniialary qarjylai jaýapkershilikke tartylýy tiis. Onyń ishinde iri kólemdegi aiyppuldar da qaralýy qajet.
“Eń aldymen, qurylys kompaniialarynyń jaýapkershiligi týraly aitý kerek. Halyqqa arnalǵan turǵyn úilerdi salý kezinde qurylys kompaniialary ákimdiktermen áleýmettik infraqurylym nysandaryn turǵyzý jóninde memorandýmdarǵa qol qoiady. Alaida bul mindettemelerdiń oryndalmaýyna naqty jaýapkershilik qarastyrylmaǵan. Sonyń kesirinen kóptegen ýáde qaǵaz júzinde qalyp, óńirlerde josparlanǵan ondaǵan áleýmettik nysan salynbai otyr. Ýáde etilgen nysandar der kezinde boi kótergende, búginde mektepterde oryn jetispeýshiligi degen másele bolmas edi”, - dedi ol.
Marat Shibutov bilim berý salasyna bólinetin qarjynyń qysqarýyna da osy jaýapsyzdyq tikelei áser etip otyrǵanyn aitty. Onyń sózinshe, biyl bilim men ǵylym salasyna 900 mlrd teńge bólingen, al byltyr bul kórsetkish 1 trln 400 mlrd teńgeni quraǵan.
“Qarjylandyrýdyń qysqarýyna sebepterdiń biri - dál osy oryndalmaǵan áleýmettik mindettemeler. Mundai jaǵdaiǵa endi jol berýge bolmaidy”, - dep atap ótti ol.
Sonymen qatar quryltai múshesi qurylys kompaniialary men ákimdikter arasynda jasalǵan barlyq memorandýmǵa tolyq ári qatań reviziia júrgizý qajettigin málimdedi.
“Kem degende Astana, Almaty jáne Shymkent qalalarynda mundai túgendeý mindetti túrde júrgizilýi kerek. Ýáde etilgen áleýmettik nysandar, ásirese mektepter salynbaiynsha, jańa qurylysqa ruqsat bermeý kerek jáne daiyn nysandardy paidalanýǵa qabyldamaý qajet. Qurylys kompaniialarynyń barlyq áleýmettik mindettemeleri sáýlet-josparlaý tapsyrmasynda zańdy túrde bekitilýi tiis. Al oryndalmaǵan jaǵdaida, aiyppul mólsheri ýáde etilgen nysannyń tolyq qunyna teń bolýy kerek. Qurylys arqyly tapqan tabys Dýbaidaǵy záýlim sarailarǵa emes, el ishindegi áleýmettik infraqurylymdy damytýǵa jumsalýy qajet”, - dedi Marat Shibutov.
