ۇلتتىق قۇرىلتايدىڭ بەسىنشى وتىرىسىندا ساياستتانۋشى مارات شيبۇتوۆ قۇرىلىس كومپانيالارىنىڭ جۇمىسىن قاتاڭ تۇردە سىنعا الدى، دەپ حابارلايدى Dalanews.kz.
قۇرىلتاي مۇشەسىنىڭ ايتۋىنشا، اكىمدىكتەرمەن جاسالعان كەلىسىمدەر اياسىندا ۋادە ەتىلگەن الەۋمەتتىك نىسانداردى سالماعان قۇرىلىس كومپانيالارى قارجىلاي جاۋاپكەرشىلىككە تارتىلۋى ءتيىس. ونىڭ ىشىندە ءىرى كولەمدەگى ايىپپۇلدار دا قارالۋى قاجەت.
“ەڭ الدىمەن، قۇرىلىس كومپانيالارىنىڭ جاۋاپكەرشىلىگى تۋرالى ايتۋ كەرەك. حالىققا ارنالعان تۇرعىن ۇيلەردى سالۋ كەزىندە قۇرىلىس كومپانيالارى اكىمدىكتەرمەن الەۋمەتتىك ينفراقۇرىلىم نىساندارىن تۇرعىزۋ جونىندە مەموراندۋمدارعا قول قويادى. الايدا بۇل مىندەتتەمەلەردىڭ ورىندالماۋىنا ناقتى جاۋاپكەرشىلىك قاراستىرىلماعان. سونىڭ كەسىرىنەن كوپتەگەن ۋادە قاعاز جۇزىندە قالىپ، وڭىرلەردە جوسپارلانعان ونداعان الەۋمەتتىك نىسان سالىنباي وتىر. ۋادە ەتىلگەن نىساندار دەر كەزىندە بوي كوتەرگەندە، بۇگىندە مەكتەپتەردە ورىن جەتىسپەۋشىلىگى دەگەن ماسەلە بولماس ەدى”، - دەدى ول.
مارات شيبۇتوۆ ءبىلىم بەرۋ سالاسىنا بولىنەتىن قارجىنىڭ قىسقارۋىنا دا وسى جاۋاپسىزدىق تىكەلەي اسەر ەتىپ وتىرعانىن ايتتى. ونىڭ سوزىنشە، بيىل ءبىلىم مەن عىلىم سالاسىنا 900 ملرد تەڭگە بولىنگەن، ال بىلتىر بۇل كورسەتكىش 1 ترلن 400 ملرد تەڭگەنى قۇراعان.
“قارجىلاندىرۋدىڭ قىسقارۋىنا سەبەپتەردىڭ ءبىرى - ءدال وسى ورىندالماعان الەۋمەتتىك مىندەتتەمەلەر. مۇنداي جاعدايعا ەندى جول بەرۋگە بولمايدى”، - دەپ اتاپ ءوتتى ول.
سونىمەن قاتار قۇرىلتاي مۇشەسى قۇرىلىس كومپانيالارى مەن اكىمدىكتەر اراسىندا جاسالعان بارلىق مەموراندۋمعا تولىق ءارى قاتاڭ ريەۆيزيا جۇرگىزۋ قاجەتتىگىن مالىمدەدى.
“كەم دەگەندە استانا، الماتى جانە شىمكەنت قالالارىندا مۇنداي تۇگەندەۋ مىندەتتى تۇردە جۇرگىزىلۋى كەرەك. ۋادە ەتىلگەن الەۋمەتتىك نىساندار، اسىرەسە مەكتەپتەر سالىنبايىنشا، جاڭا قۇرىلىسقا رۇقسات بەرمەۋ كەرەك جانە دايىن نىسانداردى پايدالانۋعا قابىلداماۋ قاجەت. قۇرىلىس كومپانيالارىنىڭ بارلىق الەۋمەتتىك مىندەتتەمەلەرى ساۋلەت-جوسپارلاۋ تاپسىرماسىندا زاڭدى تۇردە بەكىتىلۋى ءتيىس. ال ورىندالماعان جاعدايدا، ايىپپۇل مولشەرى ۋادە ەتىلگەن نىساننىڭ تولىق قۇنىنا تەڭ بولۋى كەرەك. قۇرىلىس ارقىلى تاپقان تابىس دۋبايداعى ءزاۋلىم سارايلارعا ەمەس، ەل ىشىندەگى الەۋمەتتىك ينفراقۇرىلىمدى دامىتۋعا جۇمسالۋى قاجەت”، - دەدى مارات شيبۇتوۆ.
