Asqar Qulybaevqa tiesili Qapshaǵai jaǵalaýyndaǵy jer telimderi memleketke qaitaryldy, dep habarlaidy Dalanews.kz.
"Vlast" málimetinshe, Almaty oblystyq soty Asqar Qulybaevqa tiesili Qapshaǵai sý qoimasynyń soltústik jaǵalaýyndaǵy úsh jer telimin memleketke qaitarý týraly sheshim shyǵardy. Bul týraly sot alqasynyń qaýlysy 21 mamyrda qabyldanǵan.
Qonaev qalasynyń prokýrory sotqa júginip, atalǵan úsh jer telimi boiynsha jasalǵan barlyq mámileni jaramsyz dep tanýdy surady. Onyń aitýynsha, bul telimder sý qorǵaý aimaǵynda ornalasqan jáne olar tek ýaqytsha jer paidalaný quqyǵymen ǵana berilýi tiis bolǵan.
2024 jyldyń aqpanynda sot prokýrordyń talabyn qanaǵattandyrmaǵan edi. Ol kezde sýdia sý qorǵaý aimaqtarynyń eni jer jeke menshikke berilgennen keiin ǵana belgilengenin alǵa tartqan bolatyn. Alaida mamyr aiynyń sońynda Almaty oblystyq soty bul sheshimdi ózgertip, barlyq mámileni jaramsyz dep tanydy jáne jer telimderin memleket menshigine qaitarýdy mindettedi.
Sot atalǵan jer telimderi buǵan deiin Asqar Qulybaevpen bailanysy bar tulǵalarǵa tiesili bolǵanyn anyqtady.
-
Alǵashqy jer telimi 2004 jyly Qapshaǵai qalasynyń sol kezdegi ákimi Sergei Zelenskiidiń sheshimimen Qadyr Alimbaevqa jeke menshikke berilgen. 2006 jyly ol jerdi «Tamyz-Ka» JShS satyp alǵan. Kompaniia Qulybaevtyń nemeresi Beksultan men kelini Nailá Qulybaevtarǵa tiesili bolǵan.
-
Sol jyly kórshiles telim «Jibek joly – Qazaqstan» ulttyq kompaniiasyna berilgen. 2006 jyldyń qańtarynda ol telim «Transhleb» JShS-ǵa ótken, onyń quryltaishylary Asqar men Beksultan Qulybaevtar bolǵan. Keiin bul telim «Tamyz-Ka» JShS-ǵa berilgen.
-
Úshinshi telim de 2006 jyly «Jibek joly – Qazaqstan» ulttyq kompaniiasyna berilgen, sol kezde Qulybaev kompaniia prezidenti bolǵan. Qyrkúiekte bul telimdi de «Tamyz-Ka» satyp alǵan.
2016 jyldyń 8 qyrkúieginde «Tamyz-Ka» JShS joǵaryda atalǵan úsh telimdi Asqar Qulybaevtyń ózine satqan.
Sot qaýlysynda bul mámilelerdiń barlyǵy "adal menshik iesiniń" kórinisin jasaý maqsatynda jasalǵany aitylǵan.
Sondai-aq, Balqash-Alakól basseindik inspektsiiasy bul telimderdiń biri sý qoryna jatatynyn kórsetip, tek ýaqytsha jer paidalaný quqyǵymen ǵana beriletinin atap ótken. Ekinshi telimge qatysty da inspektsiia qurylys tek 480 metrlik shekteýden tys bolǵan jaǵdaida ǵana ruqsat bergen. Úshinshi telim boiynsha kelisim múldem bolmaǵan.
Sot bul telimderdiń bastapqyda jeke menshikke ótkizilýi zańsyz bolǵanyn, iaǵni olar aýktsion ótkizbesten, nysanaly túrde berilgenin jáne bul áreket sol kezdegi Jer kodeksine qaishy ekenin málimdedi.
Sotta jer telimderiniń birinde demalys bazasy ornalasqany anyqtaldy. Onda turǵyn úi, jylý pýnkti, kúzet úii, garaj jáne monsha bar. Qalǵan eki telim oǵan irgeles jatqan, qurylysy joq, biraq kógaldandyrylǵan aýmaqtar.
Sot sheshimi jariialanǵan sátten bastap zańdy kúshine endi. Qaýlyny kassatsiialyq tártipte alty ai ishinde daýlaýǵa bolady.
