اسقار قۇلىبايەۆقا تيەسىلى قاپشاعاي جاعالاۋىنداعى جەر تەلىمدەرى مەملەكەتكە قايتارىلدى، دەپ حابارلايدى Dalanews.kz. 

"ۆلاست" مالىمەتىنشە، الماتى وبلىستىق سوتى اسقار قۇلىبايەۆقا تيەسىلى قاپشاعاي سۋ قويماسىنىڭ سولتۇستىك جاعالاۋىنداعى ءۇش جەر تەلىمىن مەملەكەتكە قايتارۋ تۋرالى شەشىم شىعاردى. بۇل تۋرالى سوت القاسىنىڭ قاۋلىسى 21 مامىردا قابىلدانعان.

قونايەۆ قالاسىنىڭ پروكۋرورى سوتقا جۇگىنىپ، اتالعان ءۇش جەر تەلىمى بويىنشا جاسالعان بارلىق مامىلەنى جارامسىز دەپ تانۋدى سۇرادى. ونىڭ ايتۋىنشا، بۇل تەلىمدەر سۋ قورعاۋ ايماعىندا ورنالاسقان جانە ولار تەك ۋاقىتشا جەر پايدالانۋ قۇقىعىمەن عانا بەرىلۋى ءتيىس بولعان.

2024 جىلدىڭ اقپانىندا سوت پروكۋروردىڭ تالابىن قاناعاتتاندىرماعان ەدى. ول كەزدە سۋديا سۋ قورعاۋ ايماقتارىنىڭ ەنى جەر جەكە مەنشىككە بەرىلگەننەن كەيىن عانا بەلگىلەنگەنىن العا تارتقان بولاتىن. الايدا مامىر ايىنىڭ سوڭىندا الماتى وبلىستىق سوتى بۇل شەشىمدى وزگەرتىپ، بارلىق مامىلەنى جارامسىز دەپ تانىدى جانە جەر تەلىمدەرىن مەملەكەت مەنشىگىنە قايتارۋدى مىندەتتەدى.

سوت اتالعان جەر تەلىمدەرى بۇعان دەيىن اسقار قۇلىبايەۆپەن بايلانىسى بار تۇلعالارعا تيەسىلى بولعانىن انىقتادى.

• العاشقى جەر تەلىمى 2004 جىلى قاپشاعاي قالاسىنىڭ سول كەزدەگى اكىمى سەرگەي زەلەنسكييدىڭ شەشىمىمەن قادىر اليمبايەۆقا جەكە مەنشىككە بەرىلگەن. 2006 جىلى ول جەردى «تامىز-كا» ج ش س ساتىپ العان. كومپانيا قۇلىبايەۆتىڭ نەمەرەسى بەكسۇلتان مەن كەلىنى ءنايلا قۇلىبايەۆتارعا تيەسىلى بولعان.

• سول جىلى كورشىلەس تەلىم «جىبەك جولى – قازاقستان» ۇلتتىق كومپانياسىنا بەرىلگەن. 2006 جىلدىڭ قاڭتارىندا ول تەلىم «ترانسحلەب» جشس-عا وتكەن، ونىڭ قۇرىلتايشىلارى اسقار مەن بەكسۇلتان قۇلىبايەۆتار بولعان. كەيىن بۇل تەلىم «تامىز-كا» جشس-عا بەرىلگەن.

• ءۇشىنشى تەلىم دە 2006 جىلى «جىبەك جولى – قازاقستان» ۇلتتىق كومپانياسىنا بەرىلگەن، سول كەزدە قۇلىبايەۆ كومپانيا پرەزيدەنتى بولعان. قىركۇيەكتە بۇل تەلىمدى دە «تامىز-كا» ساتىپ العان.

2016 جىلدىڭ 8 قىركۇيەگىندە «تامىز-كا» ج ش س جوعارىدا اتالعان ءۇش تەلىمدى اسقار قۇلىبايەۆتىڭ وزىنە ساتقان.

سوت قاۋلىسىندا بۇل مامىلەلەردىڭ بارلىعى "ادال مەنشىك يەسىنىڭ" كورىنىسىن جاساۋ ماقساتىندا جاسالعانى ايتىلعان.

سونداي-اق، بالقاش-الاكول باسسەيندىك ينسپەكسياسى بۇل تەلىمدەردىڭ ءبىرى سۋ قورىنا جاتاتىنىن كورسەتىپ، تەك ۋاقىتشا جەر پايدالانۋ قۇقىعىمەن عانا بەرىلەتىنىن اتاپ وتكەن. ەكىنشى تەلىمگە قاتىستى دا ينسپەكسيا قۇرىلىس تەك 480 مەترلىك شەكتەۋدەن تىس بولعان جاعدايدا عانا رۇقسات بەرگەن. ءۇشىنشى تەلىم بويىنشا كەلىسىم مۇلدەم بولماعان.

سوت بۇل تەلىمدەردىڭ باستاپقىدا جەكە مەنشىككە وتكىزىلۋى زاڭسىز بولعانىن، ياعني ولار اۋكسيون وتكىزبەستەن، نىسانالى تۇردە بەرىلگەنىن جانە بۇل ارەكەت سول كەزدەگى جەر كودەكسىنە قايشى ەكەنىن مالىمدەدى.

سوتتا جەر تەلىمدەرىنىڭ بىرىندە دەمالىس بازاسى ورنالاسقانى انىقتالدى. وندا تۇرعىن ءۇي، جىلۋ پۋنكتى، كۇزەت ءۇيى، گاراج جانە مونشا بار. قالعان ەكى تەلىم وعان ىرگەلەس جاتقان، قۇرىلىسى جوق، ءبىراق كوگالداندىرىلعان اۋماقتار.

سوت شەشىمى جاريالانعان ساتتەن باستاپ زاڭدى كۇشىنە ەندى. قاۋلىنى كاسساسيالىق تارتىپتە التى اي ىشىندە داۋلاۋعا بولادى.