الماتى وبلىسىندا زاڭ بۇزۋشىلىقپەن بەرىلگەن ءىرى جەر تەلىمى مەملەكەت مەنشىگىنە قايتارىلدى، دەپ حابارلايدى Dala news.

اۋىل شارۋاشىلىعى مينيسترلىگى جەر رەسۋرستارىن باسقارۋ كوميتەتىنىڭ الماتى وبلىسى بويىنشا دەپارتامەنتى قونايەۆ قالاسى اكىمدىگىنىڭ قىزمەتىنە جوسپاردان تىس تەكسەرۋ جۇرگىزدى. تەكسەرۋگە جەر ۋچاسكەسىن بەرۋ زاڭدىلىعىنا قاتىستى ماسەلەلەر نەگىز بولعان.

تەكسەرۋ بارىسىندا جالپى اۋماعى 150 مىڭ گەكتار بولاتىن جەر تەلىمى تۇرعىن-ويىن-ساۋىق كەشەنى مەن زوولوگيالىق پارك سالۋ ءۇشىن بەرىلگەنى انىقتالعان.

الايدا جەردى بەرۋ كەزىندە جەر كودەكسىنىڭ تالاپتارى بۇزىلعانى، اتاپ ايتقاندا، ۋچاسكەنى ءبولۋ قالانىڭ باس جوسپارىنا قايشى كەلگەنى بەلگىلى بولدى.

قونايەۆ قالاسى اكىمدىگىنە بەرىلگەن نۇسقاما بەلگىلەنگەن مەرزىمدە ورىندالماعان. وسىعان بايلانىستى پروكۋراتۋرا قونايەۆ قالالىق سوتىنا تالاپ ارىزبەن جۇگىندى.

سوت پروسەسى بارىسىندا جەر رەسۋرستارىن باسقارۋ دەپارتامەنتىنىڭ وكىلدەرى ءۇشىنشى تاراپ رەتىندە قاتىسىپ، انىقتالعان زاڭ بۇزۋشىلىقتار بويىنشا تۇسىنىكتەمە بەردى.

ءىستى قاراۋ ناتيجەسىندە سوت تالاپتى تولىق قاناعاتتاندىردى. كوممەرسيالىق ماقساتتا بەرىلگەن جەر ۋچاسكەسى مەملەكەت مەنشىگىنە قايتارىلدى.

سونىمەن قاتار بۇل اقپارات قوعامدا قىزۋ تالقىلانىپ جاتىر. الماتى وبلىسى اكىمىنىڭ باسپا ءسوز حاتشىسى دياس نۇراقىن الەۋمەتتىك جەلىدەگى پاراقشاسىندا 150 مىڭ گەكتار جەر تۋرالى مالىمەتتىڭ شىنايىلىعىنا كۇمان كەلتىردى.

ونىڭ ايتۋىنشا، مۇنداي كولەمدەگى جەر ويىن-ساۋىق كەشەنى ءۇشىن تىم ۇلكەن بولۋى مۇمكىن.

«الماتى وبلىسىندا 150 مىڭ گەكتار اۋماق مەملەكەت مەنشىگىنە ءوتتى دەگەن اقپارات تاراپ جاتىر. بۇل ات شاپتىرىم اۋماققا ويىن-ساۋىق ورتالىعى سالىنباقشى ەكەن دەيدى. ءدال وسى جەردە ءسال-پال لوگيكانى قوسىپ ويلانۋ كەرەك ەدى. 150 مىڭ گەكتار جەرگە ەكى الماتى قالاسىن سىيدىرۋعا بولادى. الماتىنىڭ جەر كولەمى – 68 مىڭ گەكتار»، – دەپ جازدى ول.

نۇراقىننىڭ پىكىرىنشە، مۇنداي دەرەكتەردى تاراتقاندا اقپاراتتىڭ ناقتىلىعى مۇقيات تەكسەرىلۋى ءتيىس.