Túrme Úsenovter úshin salynbaǵan...
Atyshýly Úsenov túrmeden merziminen buryn raqymshylyqqa ilinip, bosap shyqty. Bul qai Úsenov deisiz ǵoi. Otqa salsa janbaityn, sýǵa salsa batpaityn Úsenov. Sybailas jemqorlyqpen ainalysty degen aiyppen sottalǵan "Astana EKSPO-2017" Qurylys departamentiniń burynǵy basshysy Qajymurat Úsenov týraly ne aitýǵa bolady ózi. Bizdiń Zań úsenovter úshin jumys isteidi.
Úsenovti elge tanytqan onyń uly Maqsat Úsenov bolatyn. Qymbat kóligimen adam qaǵyp óltirip, jazadan erte qutylǵan ketken bolatyn. Mundai sensatsiialyq oqiǵa tek bizdiń elde ǵana bolady dep búkil aqparat quraldary shýlaǵan edi sol kezde.
Sóitsek, jazadan erte qutylý Úsenovterdiń kánigi isi eken. Mine, ákesi de milliondaǵan qarjy (az emes, 200 million teńge) jymqyrǵanyna qaramai, "asa yjdaǵatty tártibi" úshin túrmeden erte shyqty... Estýimizshe, tergeý jáne sot kezinde "óziniń kinásin elden buryn moiyndap, tergeý jumysyna airyqsha kómektesken". Endi sol "eńbegi" úshin "qurmetke" bólenip otyr. Ne deimiz, bul bizdiń Qazaqstan! Raqymshylyqqa meilinshe berilgish zańymyzdyń arqasynda OLAR túrmeden erte bosaidy. Aitpaqshy, osy Úsenov ózi túrmede otyrdy ma, álde jai ǵana túrmedegilerdiń tiziminde turdy ma?.. Negizi, túrme úsenovter úshin salynbaǵan. Ol jerde "shyn qylmyskerler" ǵana otyrady.
Munymen qosa, kezinde jemqorlyqpen ustalǵan Aýylsharýashylyǵy vitse-ministri Múslim Ómiriaev te raqymshylyqqa iligipti. Bul shendi de tutqyndylǵanda óziniń kinásin moiyndamaǵan bolatyn. Keiin "jazdym, jańyldym" degen. Sol kezdegi aýylsharýashylyq ministr Asyljan Mamytbekov "eger onyń para alǵany dáleldense, óz erkimmen jumystan ketemin" dep ýáde berip, keiin sózinen taiqyp shyqqany este qalypty.
