Túrik elektromobili Togg-nyń dizainnan bastap baǵdarlamalyq qamtamasyz etý syndy mańyzdy tehnologiialyq jetistikterin túrikter ózderi jasap shyqqan.
Túrkiia prezidenti Rejep Taiyp Erdoǵan Býrsa provintsiiasynda akkýmýliator shyǵaratyn zaýyttyń irgetasyn qalaý kezinde Túrkiianyń elektromobil shyǵarý úlken tehnologiialyq jetistik dep baǵa berdi. Jańa zaýyttyń ashylýynda Erdoǵan:
– Turkish Automobiles (Togg) bastama toby men qytailyq Farasis energetikalyq kompaniiasynyń seriktestigimen salynǵan jańa nysan otandyq elektr kólikteriniń ilgerileýine mańyzdy úles qosady. Elektrokólikterdiń jahandyq naryǵy keńeiip keledi jáne ondaǵy pozitsiiasyn nyǵaitý úshin akkýmýliatordy damytýda da aldyńǵy qatarda bolýymyz qajet, – dedi Erdoǵan.
Memleket basshysy bul rette Túrkiianyń Býrsa qalasynda shyǵarylatyn akkýmýliatorlar qoldanylatyn salalardyń aýqymy keń ekenin jáne tek avtomobil ónerkásibimen shektelmeitinin de atap ótti.
607 myń sharshy metrdi quraityn kásiporyndy qurý úshin 30 milliard lira investitsiia jumsalypty.
Jańa zaýyt Býrsadaǵy Togg avtozaýytyna jaqyn jerde ornalasqan. Jańa óndiris oryny 2024 jyldan basap, tolyqtai jumys isteitin bolady.
– Túrkiiada jasalǵan elektromobil álemdik avtomobil naryǵynda básekege qabiletti bolýy shart. Búginde ár 3 minýt saiyn bir TOGG kóligi Býrsa avtozaýytynyń konveierinen shyǵyp jatyr, – dedi Túrkiia basshysy.
Onyń aitýynsha, 2025 jyldan bastap Túrkiia elektromobilderdi ózge elderge eksporttai bastaityn bolady. Aǵymdaǵy jyldyń qorytyndysy boiynsha 28 myń TOGG elektromobil shyǵarylsa, 2030 jylǵa qarai bul kórsetkish 1 million kólikke jetedi dep kútilýde.
Túrkiia tek elektromobilder salasynda ǵana emes, sonymen qatar zariadtaý tehnologiiasy men akkýmýliatorlar salasynda da Eýropada jetekshi orynǵa shyǵýdy kózdep otyr.
