QazVac qazaqstandyq ekpeniń 2 myń dozasy Túrkistan oblysyndaǵy vaksına salatyn beketterge taratyldy. Otandyq vaksına «Bıologıalyq qaýipsizdik problemalary» ǵylymı zertteý ınstıtýtynyń bazasynda jasalǵan.
Elimizde qaterli indetke qarsy ekpe qabyldaý sharasy 1 aqpannan bastalǵan bolatyn. Sol ýaqyttan beri oblysta 45 myńǵa jýyq adam ekpe qabyldaýǵa nıet bildirdi. Onyń 17 myńǵa jýyǵy medısınalyq qyzmetker bolsa, 19 myńǵa jýyǵy pedagogtar men polısıa qyzmetkerleri.
Budan bólek ózge toptaǵy azamattar 4 myńnan asady. 22 aqpannan bastap oblysta ekinshi komponentpen (revaksınasıa) 14 myńnan astam adam vaksına saldyrdy. Sońǵy táýlikte Túrkistan oblysynda 49 adamda COVID-19 indeti anyqtaldy. Táýliktik ósim 0,94 % quraıdy. Túrkistan oblysy elimiz boıynsha «jasyl aýmaqta» tur.
Pandemıa beleń alaǵaly 657 442 PTR- synamalary alynǵan. Al, sońǵy táýlikte zerthanalarda 3 myńnan astam adam tekserildi. Aımaqta búginde jalpy 23 myńnan astam medısına qyzmetkeri bar. Onyń 5000-nan astamy dárigerler, qalǵandary orta býyn mamandary. Óńirde qaýipti indetti juqtyrǵan 4642 naýqas tolyq jazylyp shyqqan. Jalpy, pandemıa bastalǵaly Covid-19 ınfeksıasy rastalǵan 5255 jaǵdaı tirkeldi. Olardyń 3407-da aýrý sımptomsyz ótken bolatyn.
«Halyq densaýlyǵy jáne densaýlyq saqtaý júıesi týraly» kodekstiń 77-babyna sáıkes, kez kelgen medısınalyq em-shara, onyń ishinde vaksına salý tek adamnyń kelisimimen ǵana júzege asady. Vaksınadan bas tartqandar ákimshilik ne qylmystyq jaýapkershilikke tartylmaıdy. Densaýlyq saqtaý mınıstrliginiń málimetinshe, ekpe egerdiń aldynda siz arnaıy paraqqa qol qoıý arqyly vaksınadan bas tartyp nemese saldyrýǵa kelisim beresiz.
