Astana qalasynda Halyq qaharmany Roza Baǵlanova atyndaǵy halyqaralyq vokaldyq konkýrsy óz máresine jetti. Án dodasynda Túrkistan oblysynan qatysqan «Kongress Holl» kópsalaly kesheniniń talantty solisi Jomart Asyl bas báigeni enshiledi.
Jalpy 50-den astam ótinim túsip, olardyń ishinen iriktelgen 16 qatysýshy qazylar alqasy aldynda óner kórsetti. Eki kezeńnen turatyn án baiqaýynda qatysýshylar klassikalyq jáne zamanaýi týyndylardy oryndap, sheberlikterin ortaǵa saldy. Baiqaý Qazaqstannyń jáne KSRO-nyń Halyq ártisi, Halyq QaHarmany, aty ańyzǵa ainalǵan ánshi Roza Baǵlanovanyń shyǵarmashylyǵyn keńinen nasihattaýǵa, ulttyq jáne álemdik mádeniettiń úzdik dástúrleri men jetistikterin jańǵyrtýǵa baǵyttalǵan.
Sahna sandýǵashy Roza Baǵlanovanyń qurmetine arnalǵan konkýrstyń qazylar alqasy qatarynda Qazaqstan jáne Qyrǵyz Respýblikasynyń Halyq ártisi Altynbek Qorazbaev, Qyrǵyz Respýblikasynyń Halyq ártisi Roza Amanova, Ózbekstannyń Halyq ártisi Mansýr Tashmatov, Qazaqstan Respýblikasynyń eńbek sińirgen ártisteri Nurlan Abdýllin, Janna Orynbasarova, Jannat Baktai jáne «Daryn» memlekettik jastar syilyǵynyń laýreaty Álibek Álmadiev syndy ataýly óner maitalmandary bar. Qazylar alqasy oryndaýshylardyń erekshe daýysyn jáne oryndaýshylyq sheberligin zor qoshemetpen atap ótip, naǵyz mýzykalyq merekeniń atmosferasyn jasaǵan ár qatysýshyǵa alǵys bildirdi.
Aita keteiik, gala-kontsertte osy konkýrstyń jeńimpazdary jáne «Qazaqkontserttiń» kórnekti ónerpazdary óner kórsetti. Baǵdarlamada Roza Baǵlanovanyń umytylmas ánderi men qazaqstandyq kompozitorlardyń shyǵarmalary oryndaldy.
