Túrkistanda investitsiialyq ahýaldy jaqsartatyn front-ofis ashyldy
Qazirgi ýaqytta óńirde biznesti damytý, investorlar úshin qolaily jaǵdai jasaý, eksporttyq áleýetti arttyrý jáne týrizmdi damytýǵa basa nazar aýdarylýda.
Sonymen, Túrkistan oblysynda «TURKISTAN INVEST» front ofisi quryldy. Ol investorlardy tartý jáne súiemeldeý, sondai aq, eksportty damytý jumystaryn atqarýda.
– Qazirgi ýaqyt investorlar jáne eksporttaýshylarmen jumys júrgizýdiń jańa tásilin talap etedi. Investitsiia jáne eksport paralleldi túrde damýy tiis baǵyttar, sebebi sheteldik investorlardy tarta otyryp, eksporttaýshylar úshin álemdik naryqqa jaǵa jol ashylady. Osylaisha, elimizdiń eksport geografiiasyn aitarlyqtai keńeitý múmkindigi paida bolmaq. Osynyń negizinde óńirde aimaqtyq ekonomikany damytý saiasatyn ázirleitin Investitsiialar jáne eksport basqarmasy quryldy. Sondai-aq osy eki baǵytty «bir tereze» rejiminde jumys isteitin front-ofiske biriktirý tiimdi, – deidi Túrkistan oblysy ákiminiń orynbasary Meiirjan Myrzaliev.
Sonymen qatar, investitsiialardy tartý tetikteriniń tiimdiligin arttyratyn biryńǵai investorlar bazasy quryldy.
Búgin Túrkistan oblysynyń front-ofisi óńirdiń ekonomikalyq áleýetine taldaý jasady. Onyń negizinde basym investitsiialyq baǵyttar anyqtalyp, tyń jobalar ázirlendi. Nátijesinde, jalpy somasy 106,9 mlrd.teńgege 11 joba daiyndaldy. 86 investitsiialyq jobadan turatyn tizbe ázirlendi. Olardyń jalpy quny 338 mlrd.teńge. Atalǵan jobalardyń ishinde 4 317 jańa jumys oryndaryn ashýǵa múmkindik beretin somasy 179 mlrd.teńgege 43 joba 2019 jyly júzege asyrylady. Onyń ishinde quny 53,1 mlrd.teńgeni quraityn 6 joba sheteldik kapital qatysýymen iske asyrylýda. Bul jobalar jumyssyz júrgen 443 azamatty jumys ornymen qamtamasyz etetin bolady.
Sheteldik investorlar jáne eksporttaýshylardyń qolailylyǵy úshin qajetti aqparatty qamtityn jáne front-ofispen jumys barysyn aiqyn bolýyna negiz bolatyn biryńǵai sait daiyndalýda.
Statistika málimetterine sáikes, Túrkistan oblysynyń negizgi kapitalyna salynǵan investitsiialar kólemi 2019 jyldyń 5 aiynda 87,3 mlrd.teńgeni qurady, bul 2018 jyldyń sáikes kezeńimen salystyrǵanda 129,8% -ǵa joǵary.
Eksportty damytý boiynsha da kóptegen jumystar atqarylǵan. Eksport geografiiasy boiynsha taldaý jasalynyp, barlyq múmkin tosqaýyldar men sheshimder anyqtaldy, sonyń negizinde eksporttaýshylardyń biryńǵai bazasy jasaldy.
Qazirgi «Tsifrlyq Qazaqstan» memlekettik baǵdarlamasy boiynsha búkil ekonomika tsifrlyq formatqa aýysqandyqtan, aimaqta ShOB damytýdyń negizgi faktory bola alatyn «Turkestan Digital Trade» kóp fýnktsionaldy tsifrlyq saýda alańy iske qosyldy.
Statistikaǵa sáikes, Túrkistan oblysynyń óńdelgen eksporttyq ónimderiniń kólemi 2019 jyldyń 6 aiynda 342,3 mln. AQSh dollaryn qurap, 2018 jyldyń sáikes kezeńimen salystyrǵanda 132,5% -ǵa artty.
Aita ketý kerek, front-ofis táýlik boiy jumys isteidi. Keńsede qońyraý shalý ortalyǵy (call-center: 20-14) jumys isteidi, bailanys qolailyǵyn arttyrý maqsatynda mobildi qurylǵy arqyly bailanys ornatylady.
Túrkistan oblysy ákiminiń baspasóz qyzmeti
