«22 naýryz – Ulystyń uly kúni» merekesi qarsańynda memlekettik qyzmetshiler arasynda ulttyq sport túrlerinen (asyq atý, toǵyzqumalaq, gir kóterý, arqan tartý jáne qazaq kúresinen) oblystyq spartakiada ótti, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Bul saiysqa aýdan, qala ákimdikteri men basqarmalardan 18 komanda, 400-ge jýyq memlekettik qyzmetshiler qatysty. Tartysty ótken jarysta komandalyq esepte 3-oryndy Báidibek aýdany, 2-oryndy Otyrar aýdany, al 1-oryndy Túlkibas aýdany enshiledi.
Jarys sońynda QR Memlekettik qyzmet isteri agenttiginiń Túrkistan oblysy boiynsha departamenti basshysynyń mindetin atqarýshy Darhan Sýrtekov, Túrkistan oblysynyń dene shynyqtyrý jáne sport basqarmasynyń basshysy Ǵalymjan Hýdiiarov, qazaq kúresinen «Qazaqstan barysy» týrniriniń úsh dúrkin jeńimpazy Beibit Ystybaevtar jeńimpazdar men júldegerlerdi arnaiy taǵaiyndalǵan kýbok, medal jáne alǵys hattarmen marapattady. Sondai-aq oblystyq spartakiada joǵary deńgeide oiyn kórsetkenderge de marapattar usynyldy.
