El Prezıdenti Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna arnalǵan Joldaýynda jastardy otanshyldyqqa tárbıeleý, saıası sanany jańǵyrtý, qoǵamdyq dıalog ornatý máseleleri qozǵaldy. Osyǵan oraı oblys ákimi Ómirzaq Shókeev óńirde dıalogtyq alańdar ashý jóninde tapsyrma bergen bolatyn. Jańa joba osy tapsyrmany oryndaý baǵytynda qolǵa alynyp otyr.
Kezdesýde Nurmuhamed Baıǵaraev Túrkistan qalasyndaǵy qarqyndy qurylys pen mańyzdy ózgerister turǵyndardyń sanasyna oń áser etetinin aıtty.
«Kezinde elordamyzda qurylys qarqyndy júrgenin bilemiz. Búgin Túrkistandaǵy jumystardy kórip, elordanyń sol bir kezeńimen uqsastyqty ańǵarǵandaı boldym. Árıne, Túrkistannyń tarıhı mańyzy erekshe. Degenmen, birneshe jyl buryn ortalyqtan alys, aımaqtyq qalalardyń biri edi. Al qazir oblys ortalyǵy retinde damı bastady. Respýblıkanyń nazary sizderge aýyp tur. Endi osy shahardaǵy turǵyndardyń mentalıteti, oılaý júıesi ózgeredi. Ol birden baıqalmaýy múmkin, biraq, el ózgeristi sezinedi. Bul rette ózderińizdeı jastarǵa senim artylady. Sizder ýnıversıtettegi bilimmen shektelip qalmaı, qosymsha izdenip, bilimdi tereńdetý arqyly ǵana bıik shyńdy baǵyndyra alasyzdar», – degen ol jańa medıanyń damýy, gazetti oqylymdy etý, shetel men Qazaqstandaǵy BAQ salasyndaǵy úrdister týraly oı qozǵady. Qoǵamǵa ekonomıka, qarjy salasy, zań jáne saıasat taqyryptarynda saraptamalyq maqalalar qajet ekenin aıtty. Erkin suhbat ári pikir almasý formatynda ótken kezdesýde túrkistandyq jýrnalıser men jalyndy jastar belsendilik tanyta bildi.
Aldaǵy ýaqytta «Ulaǵatty urpaq» jobasy aıasyndaǵy kezdesýler oblystyń aýdan, qalalaryndaǵy bilim uıalarynda turaqty túrde ótip turady. Jobaǵa qoǵam qaıratkerleri, depýtattar, zıaly qaýym ókilderi, óner jáne sport sańlaqtary, ónertapqyshtar men kásipkerler, aqyn-jazýshylar, tarıhshylar men mádenıettanýshylar, atqarýshy bılik pen quqyq qorǵaý salasynyń ókilderi joǵary synyp oqýshylarymen jáne stýdenttermen kezdesý ótkizedi. Olar óz salasyndaǵy tájirıbelerimen bólisip, jastardyń talap-tilekterin tyńdaıdy dep josparlanǵan.
Túrkistan oblysy ákiminiń baspasóz qyzmeti
