Búgin Túrkistan qalasynda Ulystyń uly kúnine arnalǵan «Tórlet, naýryz, tórime» respýblıkalyq komandalyq aıtys ótti. Oblys ákimi Darhan Satybaldy arnaıy qatysyp, kórermen qaýymdy merekemen quttyqtady.
– Qos mereke qarsańynda Túrkistan tórinde bastaý alǵan búgingi sharanyń óńir rýhanıatyn damytýǵa yqpaly zor dep esepteımin. Memleket basshysynyń bastamasymen bıylǵy jyly Naýryz meıramy jańa serpinde atap ótilýde. Keshe elimiz boıynsha «Kórisý kúni – Amal merekesi» atap ótilse, búgingi kún qaıyrymdylyqqa, izgilikke baǵyttalyp otyr. Tól ónerimiz – aıtys jańasha formatta qarqyn aldy. Dástúrli án óneri men kúı, terme janrlarynyń jańǵyrýy – ulttyq ónerge jasalǵan oń betburys dep bilemin.
Sondyqtan qasıetti Syr dalasynan bastalyp, Túrkistan topyraǵyna taban tiregen búgingi jobanyń halyqqa bereri mol. Qazirgi tańda Túrkistanǵa erekshe mártebe berý týraly bastama kóterilip, arnaıy zań jobasy ázirlendi. Bıylǵy jyly Túrkistan – Túrki áleminiń týrısik astanasy atanyp otyr. El mádenıetin damytýǵa baǵyttalǵan sharalardyń kóptep ótýi – osy bastamalardyń júzege asýyna oń yqpalyn tıgizedi dep senemin. Jambyl oblysy men Túrkistan óńiriniń komandalyq óner dodasynyń kóshin Májilis depýtaty Amanjol Dúısenbaıulyna, Qazaqstannyń halyq aqyny Ásıa apamyzǵa, barlyq óner maıtalmanyna zor alǵys bildiremin.
Aldaǵy ýaqytta da Túrki áleminiń rýhanı baǵdaryna aınalǵan shaharda mádenıettiń órkendeýine baǵyttalǵan jańa jobalar jalǵasa beredi, – degen oblys ákimi qos óńirdiń ónerpazdary sáttilik tiledi. 
Jıynda sóz alǵan Jambyl oblystyq mádenıet, arhıvter jáne qujattama basqarmasynyń basshysy Erlan Júnisbaı oblys ákiminiń quttyqtaý sálemin jetkizdi.
Alaman báıgeni Qazaqstannyń eńbek sińirgen qaıratkeri, Májilis depýtaty Amanjol Áltaev júrgizdi. Dúbirli dodada qos óńirdiń aqyndary aıtystyń túre, súre, qaıym, qyz ben jigit aıtysy janrlarynda synǵa tústi. Sondaı-aq jyrshylar men termeshiler, dástúrli ánshiler men kúıshiler is-sharanyń kórigin qyzdyrdy. 
Jalpy baıqaýdyń talaptary men sharttaryna sáıkes, birinshi kezeńge 20 komanda qatysady, ekinshi kezeńge 10 komanda ótedi. Osy 10 komandanyń ishinen baldyq júıe boıynsha úshinshi kezeńge 4 komanda joldama alady. Jeńgen 2 komanda 2025 jyly Astana qalasynda ótetin aqtyq saıysqa qatysady.
Túrkistan oblysynan Bekarys Shoıbekov, Shahmardan Bekarysuly, Nurmahan Jaqypbek, Aıaz Rústemov, Aıan Nıazbek, Jandos Qulymbetov, Qajymuqan Abzalov, Maǵjan Áltenbaev, Dáýren Aqsaqalov, Rýslan Ahımbekovtar bolsa, Jambyl oblysynan Ahmetjan Ózbekov, Mansýr Erkebulanuly, Darhan Ábdimanat, Bekarys Kóshtaev , Ashat Qylyshbek, Dıdar Basyǵaraev, Qanat Myrzahan, Mereı Ábýeva, Alına Aıdaraly, Maralbek Babaqulov bar. 
Qazylar alqasynyń quramynda aqyn, Qazaqstannyń halyq aqyny, qazylar alqasynyń tóraıymy Asıa Berkenova Qazaqstannyń eńbek sińirgen qaıratkeri, qazylar alqasynyń múshesi Almas Almatov, ánshi, Qazaqstannyń eńbek sińirgen qaıratkeri Aıgúl Qosanova, kúıshi, sazger, Qazaqstannyń eńbek sińirgen ártisi Seken Turysbekov, aqyn, QR Mádenıet qaıratkeri Serik Qalıev, jazýshy, Halyqaralyq «Alash» ádebı syılyǵynyń ıegeri Baýyrjan Ýteýlıev bar.
Aıtys qorytyndysymen respýblıkalyq komandalyq aıtystyń ekinshi kezeńine Túrkistan oblysynyń komandasy joldama alyp, jeńimpaz atandy. Qos komandaǵa birdeı qurmet kórsetilip, árbir aqynǵa 500 myń teńgeden syıaqy berildi. Al jyrshy, termeshi, dástúrli ánshi, kúıshilerge 250 myń teńgeden tabystaldy. Sondaı-aq «AMANAT» partıasynyń arnaıy syılyǵy berildi. 
Aıta keteıik, «Tórlet, naýryz, tórime» atty alamandy «AMANAT» partıasynyń jáne Túrkistan oblysy ákimdiginiń qoldaýymen, Túrkistan oblysy mádenıet jáne týrızm basqarmasy, Aıtys aqyndary men jyrshy-termeshilerdiń Halyqaralyq odaǵy uıymdastyrǵan.
Sondaı-aq bul aıtys qos oblystaǵy aıtysker aqyndar men dástúrli ónerpazdardyń shyǵarmashylyq damýyna jaǵdaı jasaýǵa, óńirler arasynda shyǵarmashylyq baılanysty arttyrýǵa, halyqtyń azamattyq ustanymyn, áleýmettik jaýapkershiligin, otansúıgishtik sezimin, adamgershilik qasıetterin, ulttyq sanasyn qalyptastyrýǵa jáne ulttyq óner ókilderiniń rýhanı-mádenı áleýetin damytýǵa baǵyttalǵan.
