Túrkistan qalasynyń "Esimhan" alańynda uıymdastyrylǵan sharada atalǵan departamenttiń órt sóndirý jáne avarıalyq-qutqarý jumystary qyzmetine aımaq basshysy Janseıit Túımebaev túrli maqsattaǵy 20 kóliktiń kiltin tabystap, TJD mamandaryn elimizdiń basty meıramymen quttyqtady.
– Qurmetti, tótenshe jaǵdaı qyzmetiniń ókilderi! Sizderdi elimizdegi egemendiktiń eńse tiktegen kúnimen shyn júrekten quttyqtaımyn! Óz ómirlerińizdi qaýipke tóndire otyryp, azamattarymyzdyń qaýipsizdigin birinshi orynǵa qoıǵan qıyn kásipterińizde Sizderge de qurmetimiz aıryqsha. Búgingi Ózderińizge tabystalyp otyrǵan tehnıkalar turǵyndardy aıtyp kelmeıtin tótenshe jaǵdaılardan saqtap qalýǵa sep bolsa, bizdiń maqsatymyzdyń oryndalǵany dep bilem, – dedi J.Túımebaev.
Saltanatty sharaǵa oblys ákiminiń orynbasarlary, oblystyq máslıhattyń depýtattary, TJD basshylyǵy men jeke quramy qatysty.
Órt sóndirý jáne avarıalyq-qutqarý jumystary qyzmetinde qazirgi tańda 139 birlik órt sóndirý tehnıkasy bar. Onyń 96 birligi– negizgi órt sóndirý avtokólikteri, 8 birligi– arnaıy, 35 birligi – kómekshi avtokólikter. 139 birlik órt sóndirý tehnıkasynyń 75-i 20 jyldan astam ýaqyttan beri paıdalanylyp keledi. Al bekitilgen normalarǵa sáıkes 78 – negizgi, 51 – arnaıy jáne 140 – kómekshi avtokólikter bolýy tıis.
Túrkistan oblysy ákiminiń baspasóz qyzmeti
