Túrkistan qalasynda «Jibek joly» turǵyn úi kesheni paidalanýǵa tapsyryldy. Oblys ákimi Darhan Satybaldy turǵyndardyń qýanyshyn bólisýge arnaiy baryp, baspana kiltterin tabystady, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Barshańyzdy kele jatqan Táýelsizdik kúni merekesimen shyn júrekten quttyqtaimyn! Táýelsizdigimiz máńgi, mártebemiz biik bolsyn! Memleket basshysynyń tapsyrmasymen júzege asyrylyp jatqan memlekettik baǵdarlamalar turǵyndarymyzdyń jaily ómir súrýine, baspana jáne jumyspen qamtylýyna baǵyttalǵan.
Búgin kezekte turǵan 500-den asa otbasy kópten kútken páterine qol jetkizip, qonys toiyn toilaýǵa múmkindik alyp otyr. Jańa qonystaryńyz qutty bolsyn! – dedi Darhan Amangeldiuly.
«Jibek joly» turǵyn úi kesheniniń qurylysy Túrkistan qalalyq ákimdiginiń tapsyrysymen júrgizildi. Qalanyń Ákimshilik-iskerlik ortalyǵynan boi kótergen 5 qabatty 508 páterli arendalyq turǵyn úi baspana kezeginde turǵan azamattarǵa úlestiriledi.
Aita keteiik, biyl jyl basynan beri Túrkistan qalasynda kezekte turǵan 482 otbasyna páterler tabystaldy. Jalpy, jyl qorytyndysymen túrkistandyq 990 otbasy baspanamen qamtamasyz etilmek.
