Túrkistan oblystyq «Jastar resýrstyq ortalyǵy» KMM-niń jáne «Jastar rýhy» jastar qanatynyń uiymdastyrýymen «25 qazan – Respýblika kúnine» orai Túrkistan oblysy ákiminiń kýbogine arnalǵan respýblikalyq «Jaidarman» oiyny ótti. Is-sharaǵa Túrkistan oblysy ákiminiń orynbasary Ertai Altaev qatysyp, qatysýshy komandalarǵa sáttilik tiledi, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Elimizdiń eń uly meiramy Respýblika kúnine orai ótkizilip otyrǵan «Jaidarman» oiynyna qosh keldińizder. Túrkistan – tarihi ortalyq qana emes, kreativti, talantty jastardyń ordasy. Óńirde belsendi, shyǵarmashyl jastar óte kóp. «Jaidarman» – kórermen men jastardy biriktiretin sátti joba. Úlken qozǵalys. Elimiziń túkpir-túkpirinen kelgen jastardyń bir sahnada óner kórsetýi – úlken kórsetkish, birliktiń belgisi. Biz jastardy qoldaimyz jáne jastarmen bir tolqynda bolýǵa tyrysamyz. Barsha komandaǵa sáttilik tileimin! – dedi Ertai Kenjebekuly.
Jas talanttardy tanytý, jastardyń shyǵarmashylyq qabiletterin shyńdaý jáne elimizde básekege qabiletti mádeni býyn qalyptastyrýǵa úles qosý maqsatynda uiymdastyrylǵan óner dodasyn Qazaqstan KVN Odaǵy RJQB Prezidenti Esentúgel Eleýken júrgizdi. Saiysta elimizdiń ár óńirinen kelgen jáne jergilikti jastardan quralǵan 11 komanda qatysyp, óz ónerlerin ortaǵa saldy. 
Oiyn sońynda qazylar alqasy árbir komandanyń ónerin saraptap, tańdaǵan taqyryptary men ázilderiniń mazmuny, ony kórermenge jetkize bilý erekshelikterin jan-jaqty talqylap, komandalardyń erekshe tustaryn atap ótti.
Jastardyń shyǵarmashylyq qabiletterin damytýǵa jáne dostyq qarym-qatynasty nyǵaitýǵa baǵyttalǵan bul óner dodasynda qazylar alqasynyń sheshimimen bas júldeni Oral qalasynan kelgen «Talant» komandasy ielenip, 1 million teńgeni qanjylady. II orynnan Almaty qalasynan kelgen «Everest» komandasy kórinip, 500 myń teńgeni enshilese, Túrkistan oblysynyń «Aqbulaq» komandasy III oryndy mise tutyp, 300 myń teńge syiaqyǵa ie boldy. Tartysty dodanyń qatysýshy komandalaryna oblys ákiminiń alǵys haty tabystaldy.
Aita keteiik, biyl qazaq tildi «Jaidarmanǵa» 25 jyl tolyp otyr. Respýblikalyq deńgeide «Jaidarman» saiysy oblysymyzda ekinshi ret uiymdastyrylyp otyr. Qazirgi tańda óńirde 142 jaidarman komandasy bar. Oblys kóleminde biyl jastardyń qatysýymen 534 «Jaidarman» oiyny ótkizildi.
