تۇركىستان وبلىستىق «جاستار رەسۋرستىق ورتالىعى» كمم-نىڭ جانە «جاستار رۋحى» جاستار قاناتىنىڭ ۇيىمداستىرۋىمەن «25 قازان – رەسپۋبليكا كۇنىنە» وراي تۇركىستان وبلىسى اكىمىنىڭ كۋبوگىنە ارنالعان رەسپۋبليكالىق «Jaidarman» ويىنى ءوتتى. ءىس-شاراعا تۇركىستان وبلىسى اكىمىنىڭ ورىنباسارى ەرتاي التايەۆ قاتىسىپ، قاتىسۋشى كوماندالارعا ساتتىلىك تىلەدى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– ەلىمىزدىڭ ەڭ ۇلى مەيرامى رەسپۋبليكا كۇنىنە وراي وتكىزىلىپ وتىرعان «جايدارمان» ويىنىنا قوش كەلدىڭىزدەر. تۇركىستان – تاريحي ورتالىق قانا ەمەس، كرەاتيۆتى، تالانتتى جاستاردىڭ ورداسى. وڭىردە بەلسەندى، شىعارماشىل جاستار وتە كوپ. «جايدارمان» – كورەرمەن مەن جاستاردى بىرىكتىرەتىن ءساتتى جوبا. ۇلكەن قوزعالىس. ەلىمىزىڭ تۇكپىر-تۇكپىرىنەن كەلگەن جاستاردىڭ ءبىر ساحنادا ونەر كورسەتۋى – ۇلكەن كورسەتكىش، بىرلىكتىڭ بەلگىسى. ءبىز جاستاردى قولدايمىز جانە جاستارمەن ءبىر تولقىندا بولۋعا تىرىسامىز. بارشا كومانداعا ساتتىلىك تىلەيمىن! – دەدى ەرتاي كەنجەبەك ۇلى.
جاس تالانتتاردى تانىتۋ، جاستاردىڭ شىعارماشىلىق قابىلەتتەرىن شىڭداۋ جانە ەلىمىزدە باسەكەگە قابىلەتتى مادەني بۋىن قالىپتاستىرۋعا ۇلەس قوسۋ ماقساتىندا ۇيىمداستىرىلعان ونەر دوداسىن قازاقستان كۆن وداعى رجقب پرەزيدەنتى ەسەنتۇگەل ەلەۋكەن جۇرگىزدى. سايىستا ەلىمىزدىڭ ءار وڭىرىنەن كەلگەن جانە جەرگىلىكتى جاستاردان قۇرالعان 11 كوماندا قاتىسىپ، ءوز ونەرلەرىن ورتاعا سالدى. 
ويىن سوڭىندا قازىلار القاسى ءاربىر كوماندانىڭ ونەرىن ساراپتاپ، تاڭداعان تاقىرىپتارى مەن ازىلدەرىنىڭ مازمۇنى، ونى كورەرمەنگە جەتكىزە ءبىلۋ ەرەكشەلىكتەرىن جان-جاقتى تالقىلاپ، كوماندالاردىڭ ەرەكشە تۇستارىن اتاپ ءوتتى.
جاستاردىڭ شىعارماشىلىق قابىلەتتەرىن دامىتۋعا جانە دوستىق قارىم-قاتىناستى نىعايتۋعا باعىتتالعان بۇل ونەر دوداسىندا قازىلار القاسىنىڭ شەشىمىمەن باس جۇلدەنى ورال قالاسىنان كەلگەن «تالانت» كومانداسى يەلەنىپ، 1 ميلليون تەڭگەنى قانجىلادى. II ورىننان الماتى قالاسىنان كەلگەن «ەۆەرەست» كومانداسى كورىنىپ، 500 مىڭ تەڭگەنى ەنشىلەسە، تۇركىستان وبلىسىنىڭ «اقبۇلاق» كومانداسى III ورىندى مىسە تۇتىپ، 300 مىڭ تەڭگە سىياقىعا يە بولدى. تارتىستى دودانىڭ قاتىسۋشى كوماندالارىنا وبلىس اكىمىنىڭ العىس حاتى تابىستالدى.
ايتا كەتەيىك، بيىل قازاق ءتىلدى «جايدارمانعا» 25 جىل تولىپ وتىر. رەسپۋبليكالىق دەڭگەيدە «جايدارمان» سايىسى وبلىسىمىزدا ەكىنشى رەت ۇيىمداستىرىلىپ وتىر. قازىرگى تاڭدا وڭىردە 142 جايدارمان كومانداسى بار. وبلىس كولەمىندە بيىل جاستاردىڭ قاتىسۋىمەن 534 «جايدارمان» ويىنى وتكىزىلدى.
