Búgin Túrkistandaǵy «Rámizder» alańynda 25 qazan – Respýblika kúnine arnalǵan Memlekettik týdy kóterý rásimi ótti. Aldymen Qazaqstan Respýblikasynyń Memlekettik gimni shyrqalyp, Kók bairaq jelbiredi. Saltanatty jiynǵa Túrkistan oblysynyń ákimi Darhan Satybaldy, el aǵalary, jastar, qala turǵyndary qatysty, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Barshańyzdy Respýblika kúnimen shyn júrekten quttyqtaimyn! Bul – elimizdegi eń mańyzdy mereke. Memleket basshysy Qasym-Jomart Toqaev I Ulttyq quryltaida Respýblika kúnine ulttyq mereke mártebesin qaitarý týraly bastama kóterdi. Bul bastamany halyq qoldady. Sebebi, onyń tarihi máni bar. Bul – ult úshin janyn qurban etken batyr babalarymyzdyń tógilgen qany men eńbeginiń óteýi. Asyl analarymyzdyń aq tileginiń jemisi. Sondyqtan azattyqtyń qadirin bilýimiz kerek. Jyl saiyn Respýblika kúni Prezidentimiz tý kóterý rásimin ótkizedi. Bul is-shara respýblikanyń barlyq óńirinde óz jalǵasyn tabady. Mine, biyl da osy maqsatta Túrkistan tórinde júzdesip turmyz. Búgingi mereke Respýblikany qurýdaǵy tulǵalardyń eleýli eńbegin dáripteitin, azat el ekenimizdi maqtan tutanyn kún ekenin esten shyǵarmaiyq.
Elimiz aman, jurtymyz tynysh bolsyn!
Kók bairaǵymyz árdaiym kókte jelbirep, elimizdiń mártebesi biiktei bersin! – dedi oblys ákimi Darhan Satybaldy.
Respýblika kúnine orai Túrkistan qalasynda avto jáne velosherý uiymdastyryldy. Merekelik is-sharada kontserttik baǵdarlama usynylyp, otanshyldyqty dáripteitin ánder shyrqaldy. «Jańa lep» óner ujymy hor oryndady. Áskeri orkestr Eskendir Hasanǵalievtiń «Atameken» ánin, al «Saryn» toby «Qazaqstanym» ánin shyrqady. «Aidai» bi ansambli men jastar fleshmob kórsetip, kópshilikke merekelik-patriottyq kóńil-kúi syilady.
Túrkistandaǵy tý tuǵyrdyń biiktigi 62,5 metrdi quraidy. Bairaqtyń eni 12 metr bolsa, uzyndyǵy – 24 metr.
Aita keteiik, 1990 jyly 25 qazanda Qazaqstannyń memlekettik egemendigi týraly Deklaratsiia qabyldandy. Atalǵan deklaratsiia elimizdiń táýelsizdik alýyna jol ashqan mańyzdy qujat boldy. Deklaratsiiada Qazaqstannyń táýelsiz memleket retindegi saiasi-quqyqtyq negizderi, el aýmaǵynyń tutastyǵy jariialandy. Qazaq halqynyń mádenietin, dástúrin, tilin qaita túletý, ulttyq bolmysty qalyptastyrý ári nyǵaitý siiaqty memlekettik qaǵidattar bekitilip, kópshilikke usynyldy. Osy deklaratsiianyń arqasynda el táýelsizdiginiń negizi qalanǵan bolatyn.
