بۇگىن تۇركىستانداعى «رامىزدەر» الاڭىندا 25 قازان – رەسپۋبليكا كۇنىنە ارنالعان مەملەكەتتىك تۋدى كوتەرۋ ءراسىمى ءوتتى. الدىمەن قازاقستان رەسپۋبليكاسىنىڭ مەملەكەتتىك گيمنى شىرقالىپ، كوك بايراق جەلبىرەدى. سالتاناتتى جيىنعا تۇركىستان وبلىسىنىڭ اكىمى دارحان ساتىبالدى، ەل اعالارى، جاستار، قالا تۇرعىندارى قاتىستى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– بارشاڭىزدى رەسپۋبليكا كۇنىمەن شىن جۇرەكتەن قۇتتىقتايمىن! بۇل – ەلىمىزدەگى ەڭ ماڭىزدى مەرەكە. مەملەكەت باسشىسى قاسىم-جومارت توقايەۆ ءى ۇلتتىق قۇرىلتايدا رەسپۋبليكا كۇنىنە ۇلتتىق مەرەكە مارتەبەسىن قايتارۋ تۋرالى باستاما كوتەردى. بۇل باستامانى حالىق قولدادى. سەبەبى، ونىڭ تاريحي ءمانى بار. بۇل – ۇلت ءۇشىن جانىن قۇربان ەتكەن باتىر بابالارىمىزدىڭ توگىلگەن قانى مەن ەڭبەگىنىڭ وتەۋى. اسىل انالارىمىزدىڭ اق تىلەگىنىڭ جەمىسى. سوندىقتان ازاتتىقتىڭ ءقادىرىن ءبىلۋىمىز كەرەك. جىل سايىن رەسپۋبليكا كۇنى پرەزيدەنتىمىز تۋ كوتەرۋ ءراسىمىن وتكىزەدى. بۇل ءىس-شارا رەسپۋبليكانىڭ بارلىق وڭىرىندە ءوز جالعاسىن تابادى. مىنە، بيىل دا وسى ماقساتتا تۇركىستان تورىندە جۇزدەسىپ تۇرمىز. بۇگىنگى مەرەكە رەسپۋبليكانى قۇرۋداعى تۇلعالاردىڭ ەلەۋلى ەڭبەگىن دارىپتەيتىن، ازات ەل ەكەنىمىزدى ماقتان تۇتانىن كۇن ەكەنىن ەستەن شىعارمايىق.
ەلىمىز امان، جۇرتىمىز تىنىش بولسىن!
كوك بايراعىمىز ءاردايىم كوكتە جەلبىرەپ، ەلىمىزدىڭ مارتەبەسى بيىكتەي بەرسىن! – دەدى وبلىس اكىمى دارحان ساتىبالدى.
رەسپۋبليكا كۇنىنە وراي تۇركىستان قالاسىندا اۆتو جانە ۆەلوشەرۋ ۇيىمداستىرىلدى. مەرەكەلىك ءىس-شارادا كونسەرتتىك باعدارلاما ۇسىنىلىپ، وتانشىلدىقتى دارىپتەيتىن اندەر شىرقالدى. «جاڭا لەپ» ونەر ۇجىمى حور ورىندادى. اسكەري وركەستر ەسكەندىر حاسانعالييەۆتىڭ «اتامەكەن» ءانىن، ال «سارىن» توبى «قازاقستانىم» ءانىن شىرقادى. «ايداي» بي ءانسامبلى مەن جاستار فلەشموب كورسەتىپ، كوپشىلىككە مەرەكەلىك-پاتريوتتىق كوڭىل-كۇي سىيلادى.
تۇركىستان جۇرتشىلىعى ماڭىزدى مەرەكەنى جوعارى دەڭگەيدە اتاپ ءوتىپ، مەملەكەتتىك رامىزدەر دارىپتەلدى. ءبىر-بىرىن مەرەكەمەن قۇتتىقتاپ، ىزگى تىلەكتەرىن ارنادى.
تۇركىستانداعى تۋ تۇعىردىڭ بيىكتىگى 62،5 مەتردى قۇرايدى. بايراقتىڭ ەنى 12 مەتر بولسا، ۇزىندىعى – 24 مەتر.
ايتا كەتەيىك، 1990 جىلى 25 قازاندا قازاقستاننىڭ مەملەكەتتىك ەگەمەندىگى تۋرالى دەكلاراسيا قابىلداندى. اتالعان دەكلاراسيا ەلىمىزدىڭ تاۋەلسىزدىك الۋىنا جول اشقان ماڭىزدى قۇجات بولدى. دەكلاراسيادا قازاقستاننىڭ تاۋەلسىز مەملەكەت رەتىندەگى ساياسي-قۇقىقتىق نەگىزدەرى، ەل اۋماعىنىڭ تۇتاستىعى جاريالاندى. قازاق حالقىنىڭ مادەنيەتىن، ءداستۇرىن، ءتىلىن قايتا تۇلەتۋ، ۇلتتىق بولمىستى قالىپتاستىرۋ ءارى نىعايتۋ سياقتى مەملەكەتتىك قاعيداتتار بەكىتىلىپ، كوپشىلىككە ۇسىنىلدى. وسى دەكلاراسيانىڭ ارقاسىندا ەل تاۋەلسىزدىگىنىڭ نەگىزى قالانعان بولاتىن.
