Dúniejúzi qazaqtary qaýymdastyǵy Tóraǵasynyń birinshi orynbasary Zaýytbek Turysbekovtyń tyń ideiasyn QR Prezidentiniń teleradio kesheni júzege asyrǵan. Sońǵy úsh jylda qundy derektermen tolyqtyrylǵan derekti filmniń alǵashqy kórermenderi Q. A. Iasaýi atyndaǵy qazaq-túrik ýniverstitetiniń stýdentteri boldy.
Nurtas Ońdasynov zamannyń aýyr kezeńinde 13 jyl boiy Qazaqstan Halyq Komissarlar Keńesiniń tóraǵasy boldy. Úkimet basyna kelisimen birinshi kezekte elde júrip jatqan saýatsyzdyqty joiýdy qolǵa alady. Shalǵai aýdandarda muǵalimder daiarlaityn kýrstar, ýchilishe, oblys ortalyqtarynda Muǵalimder institýtyn ashty.
Halqymyzdyń perzentteri Ábish Kekilbaev pen Fariza Ońǵarsynovanyń ádebiet salasynyń shyńyna jetýine Nurtas aǵamyz yqpal jasady.
Almatydaǵy Abai eskertkishiniń avtory Hakimjan Naýryzbaevty da Qostanaiǵa barǵan issaparynda baiqap, Almatyǵa alyp kelip, oqytyp, at baǵýshydan qazaqtyń tuńǵysh músinshisin tárbielegen, ǵalym Qanysh Satbaevtyń juldyzyn jarqyratqan Nurtas Ońdasynov edi.
Al filmniń avtory Nazgúl Ábýturapova: «Qazaq dalasy uly tulǵalardan, uly danalardan kende emes. Qashanda kende bolmaǵan. Tek ony ǵasyrlar ótken saiyn shań basyp, arhivte qalady. Tarihta qalǵan keremet ǵajaiyptar, tulǵalar, derekter bar. Solardyń tek joqtaýshylary joq. Izdeýshisi joq jerde altyn da jarqyramaidy. Solardy izdep tabýymyz kerek dep oilaimyn. Nurtas Ońdasynov jaily filmniń taqyrybyn «Bilikten biik tulǵa» dep qoiǵan sebebimiz, ol kisi ultynyń múddesi úshin qyzmet etken. Ultynyń bolashaǵy úshin óziniń bedelin, jinaǵan búkil, mansabyn deimiz be, jetistigin deimiz be — barlyǵyn tárk etken. Qazir «Rýhani jańǵyrý» dep jatyrmyz. Nege rýhymyzdy, ózimizdi jańǵyrtýǵa, tarihymyzdy tolyqtyrýǵa áreket jasamaimyz?Nege toihanalar salyp, ońai tabysqa kenelemiz? Toi qazaq úshin indet. Odan arylýymyz kerek. Oilanatyn, jan- jaǵymyzǵa kóz salatyn ýaqyt keldi. Ainalamyzda tónip turǵan qaýip-qaterden saqtanýymyz kerek. Ol úshin Elbasynyń Rýhani jańǵyrý bastamasyn árbirimiz qoldap, mindetimizdi, jumysymyzdy tiianaqty adal atqarýymyz kerek», – degen pikir bildirdi.
