Túrkistan qalasynda kúi ónerin dáripteitin respýblikalyq «Kúi qudireti» kúishiler baiqaýy óz máresine jetti. «Farab» ámbebap ǵylymi kitaphanasynyń kontserttik zalynda ótken saiysqa elimizdiń ár óńirinen kelgen 23 qatysýshy eki kezeń boiynsha baq synady, - dep habarlaidy Dalanews.kz
Baiqaýdyń alǵashqy kezeńinde Súgir Áliuly men Tólegen Mombekovtiń tańdaýly shyǵarmalarynan klassikalyq kúi oryndaldy. Sodan soń ekinshi kezeńde orkestr súiemeldeýimen jeke óner kórsetti. Bul kúishilerdiń oryndaýshylyq sheberligimen qatar, sahna mádenieti men kúidi tereń seziný qabiletin baǵalaýǵa baǵyttalǵan.
Óner saiysynda Qazaqstannyń eńbek sińirgen qairatkeri, Qazaq ulttyq óner ýniversitetiniń professory Júzbai Janǵali, T.Júrgenov atyndaǵy óner akademiiasynyń dotsenti, QR Mádeniet qairatkeri kúishi-zertteýshi Ábýǵazy Murat, QR Mádeniet kairatkeri Shymkent Saz kolledjiniń ustazy Marat Anashev , QR Mádeniet salasynyń úzdigi, «Súgir» atyndaǵy ult-aspaptar orkestriniń dirijery Shyńǵys Isaev, Qurmanǵazy atyndaǵy Qazaq Ulttyq konservatoriiasynyń aǵa ustazy, QR Mádeniet salasynyń úzdigi Saltanat Qudaibergenova qazylyq etti.
Qazylar alqasynyń sheshimimen bas júlde Almaty oblysynan kelgen Meiirbek Ázimbaevqa buiyrdy. Al, I oryndy oraldyq Nazymbek Satpanov iemdense, II oryndy astanalyq Aiaýlym Asqarbaeva men Shymkentten kelgen Nurlybek Turlybai qanjyǵasyna bailady. Al, III orynǵa qaraǵandylyq Seiilhan Sailaýov, almatylyq Medet Júnisbek pen túrkistandyq Ǵalymjan Jaqsylyq jaiǵasty.
Sondai-aq, úsh qatysýshy baiqaý diplomanty atandy. Budan bólek, Tólegen Mombekov, Nurǵisa Tilendiev jáne Súgir Áliuly atyndaǵy arnaiy júldeler tabystaldy.
Aita keteiik, baiqaýdy Túrkistan oblysy ákimdiginiń qoldaýymen Oblystyq mádeniet basqarmasy, Oblystyq mádeniet jáne halyq shyǵarmashylyǵy ortalyǵy uiymdastyrǵan. Dástúrli túrde jyl saiyn ótkizilip kele jatqan baiqaýdyń maqsaty – mádeni mura men ulttyq bolmysty nasihattaý, uly dalanyń tól óneri sanalatyn kúidi ulyqtaý, ońtústik aimaǵynyń kúi ónerin dáripteý. Sondai-aq, daryndy oryndaýshylarǵa jol ashyp, jas býyndy dástúrli ónerge baýlý, olardyń shyǵarmashylyq áleýetin arttyrý.
