Túrkistanda Kúltegin, Alty alash, Máńgilik el kósheleri paida bolady
Túrkistan qalasynda Túrkistan oblysy Qoǵamdyq Keńesiniń otyrysy ótti. Jiynnyń kún tártibinde 7 másele talqylandy. Birinshi másele boiynsha oblys ákimi Janseiit Túimebaev baiandama jasap, Túrkistan qalasynyń damýy týraly sóz qozǵady.
– Mineki, Shymkentten Túrkistan qalasyna kóship kelgenimizge týra 1 ai boldy. Oblys ortalyǵynda qarqyndy jumys júrip jatyr. Túrkistannyń damýyna Elbasymyz tikelei nazar aýdaryp, kóńil bólip otyr. Túrkistan qalasynyń týristik áleýeti óte joǵary. Ótken jyly 1 mln. 190 myńnan astam týrist pen ziiaratshylar kelgen bolsa, aldaǵy ýaqytta olardyń sanyn kóbeitý kózdelip otyr. Alaida, ol úshin qalaǵa jańa áýejai, temir jol vokzaly men avtovokzal servistik qyzmet kórsetetin áleýmettik-mádeni nysandar salyp, olarǵa qajetti injenerlik infraqurylymdar júrgizý qajet. Tashkent-Túrkistan-Tashkent baǵytynda qatynaityn júrdek poiyz, Tashkent-Túrkistan-Tashkent baǵytynda avtobýs marshrýtyn ashý boiynsha aldyn ala Ózbekstan tarapymen kelisilip, QR Investitsiia jáne damý ministrligine joldandy. Qajetti jobalardyń barlyǵy Keshendi jospar jobasyna engizilip, QR Ulttyq ekonomika ministrligine usynyldy. Túrkistan qalasynda salynatyn jańa nysandar úshin qazandyq pen 3 podstantsiia qurylysyn júrgizýdi josparlap otyrmyz. Sý, gaz máseleleri jedel qolǵa alynady. Turǵyn úi máselesin shuǵyl sheshý úshin jergilikti biýdjet esebinen Túrkistan jáne Kentaý qalalarynda 1956 páterli jalpy 33 turǵyn úidiń qurylysy bastalyp ketti. Men oblys kásipkerlerin Túrkistan qalasyna investitsiia salyp, óz jumystaryn júrgizýge taǵy da shaqyramyn. Ákimdik tarapynan qoldaý bolady. Bas Jospar qabyldanǵannan keiin Túrkistanda qurylys qarqyn alady» dedi Janseiit Túimebaev.
Jiynda budan ózge myna máseleler talqylandy:
«Ońtústik Qazaqstan oblysynyń tirek aýyldyq eldi mekenderiniń tizbesin aiqyndaý týraly» Ońtústik Qazaqstan oblysy ákimdiginiń 2017 jylǵy 27 shildedegi №205 qaýlysyna ózgerister engizý týraly» Túrkistan oblysy ákimdiginiń qaýly jobasy;
«Memlekettik densaýlyq saqtaý sektory uiymdarynyń aýyldyq jerde jáne qala úlgisindegi kentterde jumys isteitin meditsina jáne farmatsevtika qyzmetkerlerine kommýnaldyq qyzmetterge jáne otynǵa arnalǵan shyǵystardy biýdjet qarajaty esebinen óteý mólsherin belgileý týraly» Ońtústik Qazaqstan oblystyq máslihatynyń 2016 jylǵy 25 aqpandaǵy №47/389-V sheshimine ózgeris engizý týraly» oblystyq máslihat sheshiminiń jobasy;
«Ońtústik Qazaqstan oblysy ákimdiginiń 2015 jylǵy 20 sáýirdegi №103 «Baqylaý Fýnktsiialaryn júzege asyrý úshin qajetti aqparat pen qujattardy saqtanýshynyń, saqtandyrýshynyń, agenttiń jáne qoǵamnyń usyný nysany men merzimderin belgileý týraly» qaýlysynyń kúshin joiý týraly» Túrkistan oblysy ákimdiginiń qaýly jobasy;
«Sýbsidiialanatyn ósimdikterdi qorǵaý quraldary túrleriniń tizbesi jáne 1 birlikke (litrge, kilogramǵa, gramǵa, danaǵa) arnalǵan sýbsidiialardyń normalaryn bekitý týraly» Túrkistan oblysy ákimdiginiń qaýly jobasy;
«Qazaqstan Respýblikasy Úkimetiniń 2018 jylǵy 24 tamyzdaǵy №516 «Qoǵamdyq keńes týraly úlgilik erejeni bekitý týraly» Qazaqstan Respýblikasy Úkimetiniń 2015 jylǵy 31 jeltoqsandaǵy №1194 qaýlysyna ózgeris engizý týraly» Qazaqstan Respýblikasy Úkimeti qaýlysynyń jobasy týraly qujattar talqyǵa salynyp, Qoǵamdyq Keńes músheleriniń qoldaýmyen qabyldandy.
«Túrkistan oblysynyń ákimshilik-aýmaqtyq birlikterin qaita ataý týraly» jáne «Túrkistan oblysy Túrkistan qalasynyń ataýy joq kóshelerine ataý berý týraly» oblystyq máslihat sheshiminiń jobasy da qoldaý tapty. Osy sheshimge sáikes, Túrkistan qalasyndaǵy «32-Razezd» eldi mekeni Qarsaqty eldi mekeni bolyp ózgertilse, «30-Razezd» eldi mekeni Eski Saýran dep atalady. Sonymen qatar, Túrkistan qalasyndaǵy aty joq 330 kóshege ataýlar berildi. Osyǵan sáikes, oblys ortalyǵynda Kúltegin, Qaztýǵan jyraý, Hanqorǵan, Alty Alash, Máńgilik El, Elim-ai, Bolat han, Kúltóbe jáne ózge de kósheler paida bolady.
Túrkistan oblysy ákiminiń baspasóz qyzmeti
