Túrkistan qalasynda zaman talabyna saı jańa «A.B.L.» fıtnes ortalyǵy ashyldy. Qýanyshty sátke oblys ákimi Nuralhan Kósherov qatysyp, jurtshylyqty quttyqtady,- dep habarlaıdy Dalanews.kz

– Túrkistan – tek rýhanı astana ǵana emes, sonymen qatar sport ortalyǵyna aınalyp kele jatqan óńir. Memleket basshysy Qasym-Jomart Toqaevtyń buqaralyq sportty damytý jónindegi tapsyrmasyna sáıkes, óńirimizde sport ınfraqurylymynyń halyqqa qoljetimdiligin arttyrý baǵytynda naqty jumystar atqarylýda. Máselen, byltyr jalpy quny 73 sport nysanynyń qurylysy aıaqtalsa, al bıyl 54 sport nysanyn paıdalanýǵa berý josparlanyp otyr. Olardyń qatarynda elimizde teńdesi joq eki iri joba – ıpodrom men eskek esý kanaly bar. Bul – sportty damytýǵa jáne ult densaýlyǵyn nyǵaıtýǵa baǵyttalǵan memleketimizdiń berik ustanymynyń aıqyn kórinisi.

Biz tek sporttyq nysandardy salyp qana qoımaı, olardyń tıimdi jumys isteýine jáne turǵyndar úshin qoljetimdi bolýyna erekshe mán berip kelemiz. Bul keshen – Túrkistan qalasy turǵyndarynyń densaýlyǵyn nyǵaıtyp, jastardyń sportqa degen qyzyǵýshylyǵyn arttyratyn mańyzdy orynǵa aınalatynyna senimdimin, – degen oblys ákimi qala turǵyndaryn salaýatty ómir saltyn ustanýǵa, sportpen júıeli túrde aınalysýǵa shaqyrdy.

Zamanaýı talaptarǵa saı salynǵan fıtnes ortalyǵynda sportpen shuǵyldanýǵa, salamatty ómir saltyn ustanýǵa barlyq jaǵdaı jasalǵan. Jattyǵý zaldary, voleıbol jáne jekpe-jek zaly bar. Sonymen birge baseın jáne ózge de dene shynyqtyrýǵa qajetti qurylǵylarmen, bólmelermen qamtylǵan.