Túrkistan qalasynda balalar men jasóspirimder arasynda «Babalar murasy – urpaqqa ulaǵat» atty epostyq jyrlardy jatqa aıtýdan oblystyq baıqaýdyń alǵashqy kezeńi ótti, – dep habarlaıdy Dalanews.kz.  

Sharaǵa óńirdegi barlyq aýdan, qalalardan jınalǵan 20-dan astam daryndy oqýshy qatysyp, «Edige» jyryn jatqa aıtty. Jalpy baıqaý ulttyq rýhty jańǵyrtatyn, jas býynnyń boıynda maqtanysh pen otansúıgishtik sezimin qalyptastyrýǵa baǵyttalǵan.

Qatysýshylardyń ónerin saraptaǵan qazylar alqasynyń quramynda oblystyq mádenıet jáne halyq shyǵarmashylyǵy ortalyǵynyń «Mádenı demalys jumystaryn uıymdastyrý» bóliminiń basshysy Murat Jumanov, jyrshy, termeshi, QR Mádenıet qaıratkeri Abylaı Bórihanov, oblystyq mádenıet jáne halyq shyǵarmashylyǵy ortalyǵynyń «Halyq shyǵarmashylyǵyn qamtamasyz etý» bóliminiń «Ulttyq shyǵarmashylyq jáne janrlar» mamany Aıazbek Rústemov boldy. Qazylar alqasy baıqaýda qatysýshylardyń jyrdy jatqa aıtý sheberligine, daýys yrǵaǵyna, sahnalyq mádenıetine jáne epostyń mánin durys jetkizýine baǵa berdi.

Nátıjesinde, otyrarlyq Beıbit Jaqsybaı bas júldeni jeńip aldy. Júldeli 1-oryndy maqtaaraldyq Dáýren Romanqul, 2-oryndy túrkistandyq Aıarý Sembaı men qazyǵurttyq Asqar Pernekúl ıelendi. Sondaı-aq, 3-orynǵa túrkistandyq Almaz Momısh, otyrarlyq Shapaǵat Derisbek, saryaǵashtyq Áset Isahbaı taban tiredi. Endigi kezekte qatysýshylar, ekinshi kezeń boıynsha «Qobylandy batyr» epostyq jyryn jatqa aıtýdan saıysqa túsedi.