Elimizdiń tuńǵysh Qorǵanys ministri, Keńes Odaǵynyń batyry, Halyq qaharmany, armiia generaly Nurmaǵambetov Saǵadat Qojahmetulyna 100 jyl tolýyn merekeleý aiasynda Túrkistan oblysynyń qorǵanys isteri jónindegi departamenti jáne bilim basqarmasynyń «Oblystyq qosymsha bilim berýdi damytý ortalyǵynyń» uiymdastyrýymen Tólebi aýdanyndaǵy «Báisheshek» jazǵy saýyqtyrý legerinde «Aibyn – 2024» oblystyq áskeri-patriottyq jiynyna irikteý saiysy ótkizildi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Jarystyń ashylýyna Túrkistan oblystyq Qorǵanys ister jónindegi departamenti bastyǵynyń orynbasary Jandos Kúlderbaev, oblystyq bilim basqarmasy «Oblystyq qosymsha bilim berýdi damytý ortalyǵynyń» ókilderi, «Qarýly Kúshteriniń ardagerleri» respýblikalyq qoǵamdyq birlestigi men jergilikti soǵys ardagerleri qatysyp, jas sarbazdarǵa sáttilik tilep jyly lebizderin bildirdi.
– Bolashaq el sarbazdaryn jastaiynan jaýyngerlikke baýlý, olardyń boiyna otanshyldyq erlik rýhty qalyptastyrý qazaqstandyqtardyń ortaq paryzy, tikelei mindeti bolyp sanalady. Jyl saiyn uiymdastyrylatyn bul sharadaǵy nátijeler aldyńǵy jyldarmen salystyrǵanda anaǵurlym jaqsy deýge bolady. Tartysty ótken irikteý saiysynan anyqtalǵan 10 er balamyz ben 5 qyz bala aldaǵy halyqaralyq saiysta jaqsy nátijeler kórsetedi dep senemin, – deidi Jandos Kúlderbaev.
«Aibyn» oblystyq áskeri-patriottyq jastar jiynynyń qorytyndysy boiynsha I oryn Arys komandasyna buiyrsa, II oryndy kentaýlyqtar jeńip aldy, al úzdik úshtikke Túlkibas aýdanynyń quramasy turaqtady. Jarys jeńimpazdaryna arnaiy diplomdar men medaldar tabystaldy.
Aita keteiik, jarys jeńimpazdary maýsym aiynda Qurlyq áskerleriniń áskeri institýtynyń bazasynda ótkiziletin halyqaralyq kezeńge jol tartady.
