ەلىمىزدىڭ تۇڭعىش قورعانىس ءمينيسترى، كەڭەس وداعىنىڭ باتىرى، حالىق قاھارمانى، ارميا گەنەرالى نۇرماعامبەتوۆ ساعادات قوجاحمەتۇلىنا 100 جىل تولۋىن مەرەكەلەۋ اياسىندا تۇركىستان وبلىسىنىڭ قورعانىس ىستەرى جونىندەگى دەپارتامەنتى جانە ءبىلىم باسقارماسىنىڭ «وبلىستىق قوسىمشا ءبىلىم بەرۋدى دامىتۋ ورتالىعىنىڭ» ۇيىمداستىرۋىمەن تولەبي اۋدانىنداعى «بايشەشەك» جازعى ساۋىقتىرۋ لەگەرىندە «ايبىن – 2024» وبلىستىق اسكەري-پاتريوتتىق جيىنىنا ىرىكتەۋ سايىسى وتكىزىلدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

جارىستىڭ اشىلۋىنا تۇركىستان وبلىستىق قورعانىس ىستەر جونىندەگى دەپارتامەنتى باستىعىنىڭ ورىنباسارى جاندوس كۇلدەربايەۆ، وبلىستىق ءبىلىم باسقارماسى «وبلىستىق قوسىمشا ءبىلىم بەرۋدى دامىتۋ ورتالىعىنىڭ» وكىلدەرى، «قارۋلى كۇشتەرىنىڭ ارداگەرلەرى» رەسپۋبليكالىق قوعامدىق بىرلەستىگى مەن جەرگىلىكتى سوعىس ارداگەرلەرى قاتىسىپ،  جاس ساربازدارعا ساتتىلىك تىلەپ جىلى لەبىزدەرىن ءبىلدىردى.

– بولاشاق ەل ساربازدارىن جاستايىنان جاۋىنگەرلىككە باۋلۋ، ولاردىڭ بويىنا وتانشىلدىق ەرلىك رۋحتى قالىپتاستىرۋ قازاقستاندىقتاردىڭ ورتاق پارىزى، تىكەلەي مىندەتى بولىپ سانالادى. جىل سايىن ۇيىمداستىرىلاتىن بۇل شاراداعى ناتيجەلەر الدىڭعى جىلدارمەن سالىستىرعاندا اناعۇرلىم جاقسى دەۋگە بولادى. تارتىستى وتكەن ىرىكتەۋ سايىسىنان انىقتالعان 10 ەر بالامىز بەن 5 قىز بالا الداعى حالىقارالىق سايىستا جاقسى ناتيجەلەر كورسەتەدى دەپ سەنەمىن، – دەيدى جاندوس كۇلدەربايەۆ.

جالپى جارىسقا اۋدان، قالالاردان بارلىعى 17 كوماندادان قۇرالعان 255 ءجاسوسپىرىم قاتىستى. بەلتەمىرگە تارتىلۋ، ارقادا جاتىپ كەۋدەنى كوتەرۋ، اسكەريلەندىرىلگەن كروسس، ارقان تارتۋ، پنيەۆماتيكالىق مىلتىق اتۋ، اك-74ء-تى جارتىلاي شاشۋ مەن جيناۋ، جامىلعى تۇرىندەگى جالپى اسكەري قورعانىس كيىمىن كيۋ سىندى جارىس تۇرلەرىنەن  ب ا ق سىنادى.

«ايبىن» وبلىستىق اسكەري-پاتريوتتىق جاستار جيىنىنىڭ قورىتىندىسى  بويىنشا  ءى ورىن  ارىس كومانداسىنا بۇيىرسا، ءىى ورىندى  كەنتاۋلىقتار جەڭىپ الدى، ال ۇزدىك ۇشتىككە تۇلكىباس اۋدانىنىڭ قۇراماسى تۇراقتادى. جارىس جەڭىمپازدارىنا ارنايى ديپلومدار مەن مەدالدار تابىستالدى.

ايتا كەتەيىك، جارىس جەڭىمپازدارى ماۋسىم ايىندا قۇرلىق اسكەرلەرىنىڭ اسكەري ينستيتۋتىنىڭ بازاسىندا وتكىزىلەتىن حالىقارالىق كەزەڭگە جول تارتادى.