– Aýyl sharýashylyǵy – Túrkistan oblysynyń negizgi draiveriniń biri. Aýylda óskendikten bul salanyń ereksheligin, qiyndyǵyn jaqsy bilemin. Eńbek adamy – eldi alǵa bastaidy. Sizderdiń eseli eńbekterińizdiń arqasynda óńirdiń agroónerkásip kesheni turaqty damyp keledi. 10 aidyń ózinde jalpy ónim kólemi ótken jyldyń tiisti kezeńinen 145,3 mlrd teńgege artyp, 951 mlrd teńgege jetti. Egis kólemi 14 myń gektarǵa ulǵaiyp, 860 myń gektarǵa deiin jetti. Jańadan 113 gektar jylyjailar salynyp, oblysymyzda jylyjaidyń jalpy kólemi 1625 gektarǵa deiin ulǵaidy. Et ónimderin eksportaýda óńirimiz respýblikada birinshi oryndamyz.
Memleket basshysy Qasym-Jomart Kemeluly aldaǵy úsh jylda azyq-túlik qaýipsizdigi máselesin túbegeili sheshý mindetin qoiyp otyr. Bul baǵytta jumys júrip jatyr. 2023 jyldan bastap aýyl sharýashylyǵy jobalaryna, kooperatsiia jelilerin damytýǵa jyldyq mólsherlemesi 2,5 paiyzben jeńildetilgen nesieler beriledi. Sizdermen birge oblystyń agrarlyq salasyn jańa baǵytta damytyp, el tabysy molaiaryna senemin, – degen Darhan Satybaldy bir top eńbek ozatyn arnaiy marapattady.
Saltanatty jiynda Túrkistan oblystyq máslihatynyń hatshysy Qairat Balabiev oblystyń ozat agroqurlymdaryn oblys ákiminiń diplomymen marapattasa, aýyl sharýashylyǵy men eńbek adamyn nasihattap júrgen BAQ ókilderine de qurmet kórsetildi. Olarǵa oblys ákiminiń alǵyshatyn Oblystyq aýyl sharýashylyǵy basqarmasynyń basshysy Turǵanbek Ospanov tapsyrdy.
Merekelik keshte Túrkistan óńiriniń tanymal ónerpazdary men belgili ánshi Mádina Sádýaqasova óner kórsetip, Túrkistan óńiriniń aýyl sharýashylyǵy salasy ókilderin merekemen quttyqtady.
Túrkistan oblysynda aýyl sharýashylyǵy qarqyndy damý ústinde. Aýyl sharýashylyǵynyń negizgi kapitalyna 56,5 mlrd teńgege investitsiialar tartylyp 116,1%-ǵa ulǵaidy. Tamaq óndirisine 6,7 mlrd teńge investitsiia salyndy.
Túrkistan oblysyn damytýdyń keshendi josparyn aiasynda Túrkistan qalasy ainalasynda 11,0 myń gektar azyq-túlik beldeýin qurý jobasy júzege asyrylýda. Quny 6,5 mlrd. tg quraityn 5 investitsiialyq joba iske asyryldy jáne 2 myń gektarǵa jańbyrlatyp sýǵarý tehnologiiasy ornatyldy.
Dándi daqyldar ótken jylmen salystyrǵanda 190 myń tonnaǵa artyp, 777,0 myń tonnaǵa jetse, kókónis, baqsha ónimderi kólemi 120 myń tonnaǵa artyp, 3 mln. 245,5 myń teńgege jetken. 2022 jyldyń 10 aiynyń qorytyndysymen jalpy 1 066,5 myń tonna ónim eksporttalyp, 354.7 mln AQSh dollaryn qurady.
