– اۋىل شارۋاشىلىعى – تۇركىستان وبلىسىنىڭ نەگىزگى درايۆەرىنىڭ ءبىرى. اۋىلدا وسكەندىكتەن بۇل سالانىڭ ەرەكشەلىگىن، قيىندىعىن جاقسى بىلەمىن. ەڭبەك ادامى – ەلدى العا باستايدى. سىزدەردىڭ ەسەلى ەڭبەكتەرىڭىزدىڭ ارقاسىندا ءوڭىردىڭ اگروونەركاسىپ كەشەنى تۇراقتى دامىپ كەلەدى. 10 ايدىڭ وزىندە جالپى ءونىم كولەمى وتكەن جىلدىڭ ءتيىستى كەزەڭىنەن 145،3 ملرد تەڭگەگە ارتىپ، 951 ملرد تەڭگەگە جەتتى. ەگىس كولەمى 14 مىڭ گەكتارعا ۇلعايىپ، 860 مىڭ گەكتارعا دەيىن جەتتى. جاڭادان 113 گەكتار جىلىجايلار سالىنىپ، وبلىسىمىزدا جىلىجايدىڭ جالپى كولەمى 1625 گەكتارعا دەيىن ۇلعايدى. ەت ونىمدەرىن ەكسپورتاۋدا ءوڭىرىمىز رەسپۋبليكادا ءبىرىنشى ورىندامىز.
مەملەكەت باسشىسى قاسىم-جومارت كەمەل ۇلى الداعى ءۇش جىلدا ازىق-تۇلىك قاۋىپسىزدىگى ماسەلەسىن تۇبەگەيلى شەشۋ مىندەتىن قويىپ وتىر. بۇل باعىتتا جۇمىس ءجۇرىپ جاتىر. 2023 جىلدان باستاپ اۋىل شارۋاشىلىعى جوبالارىنا، كووپەراسيا جەلىلەرىن دامىتۋعا جىلدىق مولشەرلەمەسى 2،5 پايىزبەن جەڭىلدەتىلگەن نەسيەلەر بەرىلەدى. سىزدەرمەن بىرگە وبلىستىڭ اگرارلىق سالاسىن جاڭا باعىتتا دامىتىپ، ەل تابىسى مولايارىنا سەنەمىن، – دەگەن دارحان ساتىبالدى ءبىر توپ ەڭبەك وزاتىن ارنايى ماراپاتتادى.
اتاپ ايتساق، ق ر اۋىل شارۋاشىلىعى مينيسترلىگىنىڭ «ەڭبەك ارداگەرى» مەدالى، «اۋىل شارۋاشىلىعى سالاسىنىڭ ۇزدىگى» توسبەلگىسى، «قۇرمەت» گراموتاسى تاپسىرىلدى. سونىمەن بىرگە اگروونەركاسىپ كەشەنىن دامىتۋدا وزات اتانعان اۋدان اكىمدەرى وبلىس اكىمىنىڭ ديپلومىنا يە بولدى. ءبىرىنشى ورىندى سايرام اۋدانى ەنشىلەسە، ەكىنشى جانە ءۇشىنشى ورىنداردى بايدىبەك پەن سارىاعاش اۋداندارى ەنشىلەدى.
سالتاناتتى جيىندا تۇركىستان وبلىستىق ءماسليحاتىنىڭ حاتشىسى قايرات بالابييەۆ وبلىستىڭ وزات اگروقۇرلىمدارىن وبلىس اكىمىنىڭ ديپلومىمەن ماراپاتتاسا، اۋىل شارۋاشىلىعى مەن ەڭبەك ادامىن ناسيحاتتاپ جۇرگەن ب ا ق وكىلدەرىنە دە قۇرمەت كورسەتىلدى. ولارعا وبلىس اكىمىنىڭ العىسحاتىن وبلىستىق اۋىل شارۋاشىلىعى باسقارماسىنىڭ باسشىسى تۇرعانبەك وسپانوۆ تاپسىردى.
مەرەكەلىك كەشتە تۇركىستان ءوڭىرىنىڭ تانىمال ونەرپازدارى مەن بەلگىلى ءانشى ءمادينا ءسادۋاقاسوۆا ونەر كورسەتىپ، تۇركىستان ءوڭىرىنىڭ اۋىل شارۋاشىلىعى سالاسى وكىلدەرىن مەرەكەمەن قۇتتىقتادى.
تۇركىستان وبلىسىندا اۋىل شارۋاشىلىعى قارقىندى دامۋ ۇستىندە. اۋىل شارۋاشىلىعىنىڭ نەگىزگى كاپيتالىنا 56،5 ملرد تەڭگەگە ينۆەستيسيالار تارتىلىپ 116،1%-عا ۇلعايدى. تاماق وندىرىسىنە 6،7 ملرد تەڭگە ينۆەستيسيا سالىندى.
تۇركىستان وبلىسىن دامىتۋدىڭ كەشەندى جوسپارىن اياسىندا تۇركىستان قالاسى اينالاسىندا 11،0 مىڭ گەكتار ازىق-تۇلىك بەلدەۋىن قۇرۋ جوباسى جۇزەگە اسىرىلۋدا. قۇنى 6،5 ملرد. تگ قۇرايتىن 5 ينۆەستيسيالىق جوبا ىسكە اسىرىلدى جانە 2 مىڭ گەكتارعا جاڭبىرلاتىپ سۋعارۋ تەحنولوگياسى ورناتىلدى.
ءداندى داقىلدار وتكەن جىلمەن سالىستىرعاندا 190 مىڭ تونناعا ارتىپ، 777،0 مىڭ تونناعا جەتسە، كوكونىس، باقشا ونىمدەرى كولەمى 120 مىڭ تونناعا ارتىپ، 3 ملن. 245،5 مىڭ تەڭگەگە جەتكەن. 2022 جىلدىڭ 10 ايىنىڭ قورىتىندىسىمەن جالپى 1 066،5 مىڭ توننا ءونىم ەكسپورتتالىپ، 354.7 ملن اقش دوللارىن قۇرادى.
