Shahtinsk qalasynda alaiaqtyq pen bopsalaý boiynsha rezonans týdyrǵan is boiynsha sot úkimi shyqty, dep habarlaidy dalanews.kz.
Qaraǵandy oblysynda 10 adam turǵyndarǵa qatysty alaiaqtyq jasap, bopsalaýmen ainalysty degen aiyppen sot aldynda jaýap berdi. Sot materialdaryna sáikes, olar 2023 jyldan 2024 jyldyń qyrkúiegine deiin aldyn ala sóz bailasý arqyly áreket etip, Shahtinsk qalasynyń keminde 14 turǵynynan zańsyz jolmen aqsha alǵan.
Tergeý málimetinshe, kúdiktiler jábirlenýshilerdi aldap, senimge kirip, kei jaǵdaida kúsh qoldanamyz dep qorqytqan. Sonyń saldarynan turǵyndar ártúrli kólemde nesie rásimdeýge májbúr bolǵan. Alaida alynǵan qarajatty ózderi paidalana almaǵan. Aqshany aiyptalýshylar iemdenip otyrǵan.
Sot úkimimen birneshe aiyptalýshy 4 jyl 8 aidan 7 jylǵa deiin bas bostandyǵynan aiyryldy. Eki adamǵa 6 jyl, taǵy eki adamǵa 5 jyl, bir adamǵa 7 jyl, qalǵandaryna 4 jyl 8 ai jáne 6 jyl 6 ai jaza taǵaiyndaldy.
Aiyptalýshylardyń birine raqymshylyq týraly zań qoldanylyp, ol jazadan bosatyldy. Taǵy bir sottalýshyǵa kámeletke tolmaǵan, onkologiialyq aýrýǵa shaldyqqan balasynyń bolýyna bailanysty 4 jyl 8 ai merzimge bas bostandyǵyn shekteý jazasy berildi.
Prokýratýra sottalýshylarǵa 4 jyldan 12 jylǵa deiin jaza taǵaiyndaýdy suraǵan. Al qorǵaý tarapy olardyń áreketterinde qylmys quramy joq ekenin aityp, aqtaýdy talap etken.
Sot málimetinshe, is boiynsha taǵylǵan baptar aýyr qylmystar sanatyna jatady. Kei epizodtar boiynsha zańda 10 jylǵa deiin bas bostandyǵynan aiyrý qarastyrylǵan.
Ázirge úkim zańdy kúshine engen joq.
