Aqtaýda 49 jastaǵy Erbol Aitýov plastikalyq operatsiiadan keiin qaitys boldy. Ol iek tusyna liposaktsiia jasatý úshin «Qasiet» klinikasyna júgingen, dep habarlaidy dalanews.kz.
Marqumnyń jubaiynyń aitýynsha, 4 sáýir kúni narkoz salý kezinde naýqastyń jaǵdaiy kúrt nasharlaǵan. Onyń sózinshe, intýbatsiia durys jasalmaǵandyqtan, er adamnyń qan qysymy men qandaǵy qant deńgeii kóterilip ketken. Sonyń saldarynan ishemiialyq insýlt alyp, komaǵa túsken. Bir aidan keiin kóz jumǵan.
Týystary meditsinalyq mekeme kómekti der kezinde kórsetpedi jáne naýqastyń shynaiy jaǵdaiyn jasyrdy dep málimdep otyr.
Densaýlyq saqtaý ministrliginiń jospardan tys tekserisi kezinde klinikadan birqatar zańbuzýshylyq anyqtalǵan.
Tekserý qorytyndysyna sáikes, operatsiia blogy tolyq jabdyqtalmaǵan. Kei qurylǵylardyń paidalaný merzimi ótip ketken, al anafilaktikalyq shok kezinde qoldanylatyn dáriler múlde bolmaǵan.
Sonymen qatar klinikanyń eresekterge arnalǵan anesteziologiia jáne reanimatsiia qyzmetin kórsetýge litsenziiasy bolmaǵany belgili boldy.
Tekserý barysynda naýqastyń operatsiiaǵa qarsy kórsetilimderi bola tura jáne qajetti analizder tolyq tapsyrylmai jatyp otaǵa jiberilgeni anyqtalǵan.
Is materialdary prokýratýraǵa joldandy.
Erbol Aitýov Mańǵystaý oblystyq máslihatynyń depýtaty bolǵan. Sondai-aq 2023 jyldan beri Mańǵystaý oblysy kásipkerler palatasynyń óńdeý ónerkásibi jáne bazalyq salalar komitetin basqarǵan.
Eske salsaq, 15 mamyr kúni Almatydaǵy plastikalyq hirýrgiia klinikasynda 53 jastaǵy bloger Saýle Bazarhan da kóz jumǵan edi. Ol da liposaktsiia jasatýdy josparlaǵan.
