Túrkistan óńirinde oblys ákimi Darhan Satybaldynyń tapsyrmasymen óndiristi damytý, investitsiia tartý, jumys oryndaryn ashý baǵytynda aýqymdy jumys júrip jatyr. Sonymen birge shet memleketterdiń óndiristegi tájiribeleri zerttelip, kelissózder jalǵasýda. Túrkistan oblysynyń delegatsiiasy jeńil ónerkásip salasyn damytý maqsatynda Ózbekstan Respýblikasynyń Tashkent, Samarqand, Jyzaq óńirlerindegi mata-toqyma kásiporyndary basshylarymen kezdesip tájiribie almasty, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Kelissózder júrgizilip, osy salada áriptestik ornatyldy. Toqyma salasyndaǵy tanymal «SAFF TEXTILE» JShS, «Afrasiab jeans textile» JShS, «Aya textile» JShS, «VIRTUS Tricot» JShS, «Daka Tex» JShS jáne «Samarqand euro asia textile» kompaniialarymen kelisimder jasaldy.
Túrkistandyq delegatsiia Ózbekstannyń birneshe aimaǵynda kezdesýler ótkizdi. Túrkistan oblysynyń kásipkerlik jáne ónerkásip basqarmasy basshysynyń orynbasary Nurgúl Abdrazaqova aimaqtyń investitsiialyq áleýeti, ekonomikalyq damýy týraly baiandama jasap, jeńil ónerkásip salasynda áriptestik ornatý baǵytyndaǵy jumystardy jandandyra túsýdi usyndy. Birlesken jobalardy iske asyrý sheńberinde «Óztekstilprom» qaýymdastyǵy men Túrkistan oblysynyń ókilderi arasyndaǵy yntymaqtastyqty keńeitý jónindegi máseleler men usynystardy talqylandy. Ózbekstannyń toqyma salasy kásiporyndarynyń jumysyn kórý, tájiribe almasý joldary qaraldy. Yntymaqtastyq týraly memorandýmdarǵa qol qoiý máselesi de saralandy.
Aita keteiik, Túrkistan oblys ákiminiń tapsyrmasyna sáikes, Kásipkerlik jáne ónerkásip basqarmasynyń uiymdastyrýymen «Qazaqstan Respýblikasy toqyma jáne tigin-toqyma ónerkásibi kásiporyndarynyń qaýymdastyǵy» zańdy tulǵalar men jeke kásipkerler birlestigi resmi tirkeýden ótip jatyr. Maqsat – Qazaqstan Respýblikasynyń jeńil ónerkásipti damytýdyń 2022-2025 jyldarǵa arnalǵan jol kartasyn oryndaý, oblysta jumyssyzdar sanyn azaitý, jeńil ónerkásip salasynda jańa investitsiialyq jobalardy ashý jáne investitsiia tartý.
