تۇركىستان وڭىرىندە وبلىس اكىمى دارحان ساتىبالدىنىڭ تاپسىرماسىمەن ءوندىرىستى دامىتۋ، ينۆەستيسيا تارتۋ، جۇمىس ورىندارىن اشۋ باعىتىندا اۋقىمدى جۇمىس ءجۇرىپ جاتىر. سونىمەن بىرگە شەت مەملەكەتتەردىڭ وندىرىستەگى تاجىريبەلەرى زەرتتەلىپ، كەلىسسوزدەر جالعاسۋدا. تۇركىستان وبلىسىنىڭ دەلەگاسياسى جەڭىل ونەركاسىپ سالاسىن دامىتۋ ماقساتىندا وزبەكستان رەسپۋبليكاسىنىڭ تاشكەنت، سامارقاند، جىزاق وڭىرلەرىندەگى ماتا-توقىما كاسىپورىندارى باسشىلارىمەن كەزدەسىپ تاجىريبيە الماستى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
كەلىسسوزدەر جۇرگىزىلىپ، وسى سالادا ارىپتەستىك ورناتىلدى. توقىما سالاسىنداعى تانىمال «SAFF TEXTILE» ج ش س، «Afrasiab jeans textile» ج ش س، «Aya textile» ج ش س، «VIRTUS Tricot» ج ش س، «Daka Tex» ج ش س جانە «Samarqand euro asia textile» كومپانيالارىمەن كەلىسىمدەر جاسالدى.
تۇركىستاندىق دەلەگاسيا وزبەكستاننىڭ بىرنەشە ايماعىندا كەزدەسۋلەر وتكىزدى. تۇركىستان وبلىسىنىڭ كاسىپكەرلىك جانە ونەركاسىپ باسقارماسى باسشىسىنىڭ ورىنباسارى نۇرگۇل ابدرازاقوۆا ايماقتىڭ ينۆەستيسيالىق الەۋەتى، ەكونوميكالىق دامۋى تۋرالى بايانداما جاساپ، جەڭىل ونەركاسىپ سالاسىندا ارىپتەستىك ورناتۋ باعىتىنداعى جۇمىستاردى جانداندىرا ءتۇسۋدى ۇسىندى. بىرلەسكەن جوبالاردى ىسكە اسىرۋ شەڭبەرىندە «وزتەكستيلپروم» قاۋىمداستىعى مەن تۇركىستان وبلىسىنىڭ وكىلدەرى اراسىنداعى ىنتىماقتاستىقتى كەڭەيتۋ جونىندەگى ماسەلەلەر مەن ۇسىنىستاردى تالقىلاندى. وزبەكستاننىڭ توقىما سالاسى كاسىپورىندارىنىڭ جۇمىسىن كورۋ، تاجىريبە الماسۋ جولدارى قارالدى. ىنتىماقتاستىق تۋرالى مەموراندۋمدارعا قول قويۋ ماسەلەسى دە سارالاندى.
ايتا كەتەيىك، تۇركىستان وبلىس اكىمىنىڭ تاپسىرماسىنا سايكەس، كاسىپكەرلىك جانە ونەركاسىپ باسقارماسىنىڭ ۇيىمداستىرۋىمەن «قازاقستان رەسپۋبليكاسى توقىما جانە تىگىن-توقىما ونەركاسىبى كاسىپورىندارىنىڭ قاۋىمداستىعى» زاڭدى تۇلعالار مەن جەكە كاسىپكەرلەر بىرلەستىگى رەسمي تىركەۋدەن ءوتىپ جاتىر. ماقسات – قازاقستان رەسپۋبليكاسىنىڭ جەڭىل ونەركاسىپتى دامىتۋدىڭ 2022-2025 جىلدارعا ارنالعان جول كارتاسىن ورىنداۋ، وبلىستا جۇمىسسىزدار سانىن ازايتۋ، جەڭىل ونەركاسىپ سالاسىندا جاڭا ينۆەستيسيالىق جوبالاردى اشۋ جانە ينۆەستيسيا تارتۋ.
