Túrkistan oblysynda ulttyq halyq sanaq jumysyna 2 847 adam qatysady
Biyl 1 qyrkúiek pen 30 qazan aralyǵynda elimizde Ulttyq sanaq ótkiziledi. Osyǵan bailanysty óńirde qarqyndy túrde daiyndyq jumystary bastaldy. Bul týraly Óńirlik kommýnikatsiialar qyzmetinde ótken brifingte Túrkistan oblysy Statistika departamentiniń basshysy Baǵlan Qarǵulov málimdedi, – dep habarlaidy Dalanews.kz.
– Ulttyq sanaq eldegi karantindik sharalarǵa bailanysty 2020 jyldan 2021 jylǵa aýystyrylǵan bolatyn. Aǵymdaǵy jyly ótetin ulttyq halyq sanaǵynyń basty ereksheligi – sanaq protsesi avtomattandyrylyp saýalnama paraqtaryn mamandar elektrondy planshette toltyrý arqyly júzege asyratyn bolady. «Qazaqstanda árkim mańyzdy!» urany aiasynda uiymdastyrylyp jatqan halyq sanaǵy elimizde alǵash ret jappai aralaýmen birge onlain-rejimde ótkiziledi. Biylǵy halyq sanaǵy 2 kezeńmen júrgiziledi. Birinshi – daiyndyq kezeńi jáne ekinshi – negizgi kezeń, – dedi B.Abaibekuly.
Departament basshysynyń sózinshe, sanaqtyń birinshi – daiyndyq kezeńi 1 - 30 maýsym aralyǵynda ótedi. Oǵan 127 ýákil, 50 nusqaýshy-baqylaýshy jáne 352 interviýer jumyldyryldy. Interviýerler mórmen rastalǵan kýálikpen, sanaqqa qajetti qural-jabdyqtar jáne portfelmen qamtamasyz etilgen. Olar turǵyn jáne turǵyn emes úi-jailardyń meken-jailaryn, sondai-aq olarda turatyn halyqtyń sanyn naqtylaidy.
Sondai-aq, kez kelgen azamat ornalasqan jerine qaramastan, ózin jáne otbasy múshelerin www.sanaq.gov.kz jáne www.e-gov.kz saittary arqyly sanaqtan ótkize alady. Onlain-rejim sanaǵynan ótpegen azamattardy qamtý úshin 1 men 30 qazan aralyǵynda dástúrli jappai aralaý ádisi josparlanǵan. Bul sanaq protsesi jumystaryn júrgizýge oblys boiynsha jalpy 2 847 adam qatysady.
