– ۇلتتىق ساناق ەلدەگى كارانتيندىك شارالارعا بايلانىستى 2020 جىلدان 2021 جىلعا اۋىستىرىلعان بولاتىن. اعىمداعى جىلى وتەتىن ۇلتتىق حالىق ساناعىنىڭ باستى ەرەكشەلىگى – ساناق پروسەسى اۆتوماتتاندىرىلىپ ساۋالناما پاراقتارىن ماماندار ەلەكتروندى پلانشەتتە تولتىرۋ ارقىلى جۇزەگە اسىراتىن بولادى. «قازاقستاندا اركىم ماڭىزدى!» ۇرانى اياسىندا ۇيىمداستىرىلىپ جاتقان حالىق ساناعى ەلىمىزدە العاش رەت جاپپاي ارالاۋمەن بىرگە ونلاين-رەجيمدە وتكىزىلەدى. بيىلعى حالىق ساناعى 2 كەزەڭمەن جۇرگىزىلەدى. ءبىرىنشى – دايىندىق كەزەڭى جانە ەكىنشى – نەگىزگى كەزەڭ، – دەدى ب.ابايبەك ۇلى.
دەپارتامەنت باسشىسىنىڭ سوزىنشە، ساناقتىڭ ءبىرىنشى – دايىندىق كەزەڭى 1 - 30 ماۋسىم ارالىعىندا وتەدى. وعان 127 ۋاكىل، 50 نۇسقاۋشى-باقىلاۋشى جانە 352 ينتەرۆيۋەر جۇمىلدىرىلدى. ينتەرۆيۋەرلەر مورمەن راستالعان كۋالىكپەن، ساناققا قاجەتتى قۇرال-جابدىقتار جانە پورتفەلمەن قامتاماسىز ەتىلگەن. ولار تۇرعىن جانە تۇرعىن ەمەس ءۇي-جايلاردىڭ مەكەن-جايلارىن، سونداي-اق ولاردا تۇراتىن حالىقتىڭ سانىن ناقتىلايدى.
سونداي-اق، كەز كەلگەن ازامات ورنالاسقان جەرىنە قاراماستان، ءوزىن جانە وتباسى مۇشەلەرىن www.sanaq.gov.kz جانە www.e-gov.kz سايتتارى ارقىلى ساناقتان وتكىزە الادى. ونلاين-رەجيم ساناعىنان وتپەگەن ازاماتتاردى قامتۋ ءۇشىن 1 مەن 30 قازان ارالىعىندا ءداستۇرلى جاپپاي ارالاۋ ءادىسى جوسپارلانعان. بۇل ساناق پروسەسى جۇمىستارىن جۇرگىزۋگە وبلىس بويىنشا جالپى 2 847 ادام قاتىسادى.
