Túrkistan oblysynda investitsiia tartý, óndiris oryndaryn ashýǵa basymdyq berilgen. Oblys ákimi Darhan Satybaldy Ordabasy aýdanyna jumys saparynda osy saladaǵy bastamalardy taǵy bir pysyqtady. Naqty aitsaq, aýdanda eki óndiristik aimaq qurylady jáne «Badam» indýstrialdy aimaǵy 50 gektarǵa ulǵaiady, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Aldymen Shubar aýylynda óndiristik aimaq qurý úshin josparlanǵan 60 gektar jerdiń jobasymen tanysqan óńir basshysy infraqurylym, uiymdastyrý jumystaryn sapaly júrgizý mańyzdy ekenin aitty. Badam-Shubar avtojolynyń boiynda, Batys Eýropa – Batys Qytai avtodálizinen 500 metr qashyqtyqta ornalasqan aýmaqta infraqurylym tartylady dep josparlanyp otyr. Qýattylyǵy 25 MVT qosalqy stantsiia, 1,5 shaqyrym elektr júiesi, 2,1 shaqyrym sý júiesi, 0,7 shaqyrym gaz júiesi, uńǵyma qurylysy júrgizilýi tiis.
Oblys ákimine Shubarsý Aýylynda óndiristik aimaq qurý úshin josparlanǵan 50 gektar jerdiń jobasy da tanystyryldy. Munda da sý, gaz, elektr júielerin tartý kerek.
– Barlyq aýdan, qalada indýstrialdy aimaqtardy tiimdi paidalaný, jańa óndiristik aimaqtar ashý óte mańyzdy. Osy baǵytta jumysty kúsheitýdi tapsyramyn. Óndiris oryndaryn, kásiporyndar ashý boiynsha belsendi jumys júrgizilsin. Investorlar tartyńyzdar. Biz óz tarapymyzdan investitsiialyq jobalardy júzege asyrýǵa qoldaý kórsetemiz. Bul rette megapoliske jaqyn ornalasqan Ordabasy aýdanynyń áleýeti óte joǵary, – dedi Darhan Satybaldy.
Oblys ákimi Aqbulaq aýylyndaǵy «Badam» indýstrialdy aimaǵyna da baryp, jer kólemin 50 gektarǵa ulǵaitý jobasymen tanysty. Joǵaryda atalǵan jobalar iske assa, Túrkistan oblysyndaǵy kásiporyndar jáne jumys oryndary kóbeiedi degen jospar bar.
Aita keteiik, 2023 jyly Túrkistan oblysynyń ekonomikasyna 972 mlrd. teńge tartylyp, aldyńǵy jylmen salystyrǵanda 126,1%-ǵa artty. Onyń ishinde jeke investitsiialar 705,1 mlrd. teńge bolsa, biýdjettik investitsiialar – 266,9 mlrd. teńge. Ósim dinamikasy boiynsha oblys respýblikada 3-orynda tur.
