تۇركىستان وبلىسىندا وندىرىستىك ايماقتار سانى ارتادى

Dalanews 08 ءساۋ. 2024 15:07 1105

تۇركىستان وبلىسىندا ينۆەستيسيا تارتۋ، ءوندىرىس ورىندارىن اشۋعا باسىمدىق بەرىلگەن. وبلىس اكىمى دارحان ساتىبالدى ورداباسى اۋدانىنا جۇمىس ساپارىندا وسى سالاداعى باستامالاردى تاعى ءبىر پىسىقتادى. ناقتى ايتساق، اۋداندا ەكى وندىرىستىك ايماق قۇرىلادى جانە «بادام» يندۋستريالدى ايماعى 50 گەكتارعا ۇلعايادى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
 
الدىمەن شۇبار اۋىلىندا وندىرىستىك ايماق قۇرۋ ءۇشىن جوسپارلانعان 60 گەكتار جەردىڭ جوباسىمەن تانىسقان ءوڭىر باسشىسى ينفراقۇرىلىم، ۇيىمداستىرۋ جۇمىستارىن ساپالى جۇرگىزۋ ماڭىزدى ەكەنىن ايتتى. بادام-شۇبار اۆتوجولىنىڭ بويىندا، باتىس ەۋروپا – باتىس جۇڭگو اۆتودالىزىنەن 500 مەتر قاشىقتىقتا ورنالاسقان اۋماقتا ينفراقۇرىلىم تارتىلادى دەپ جوسپارلانىپ وتىر. قۋاتتىلىعى 25 مۆت قوسالقى ستانسيا، 1،5 شاقىرىم ەلەكتر جۇيەسى، 2،1 شاقىرىم سۋ جۇيەسى، 0،7 شاقىرىم گاز جۇيەسى، ۇڭعىما قۇرىلىسى جۇرگىزىلۋى ءتيىس.
 
وبلىس اكىمىنە شۇبارسۋ اۋىلىندا وندىرىستىك ايماق قۇرۋ ءۇشىن جوسپارلانعان 50 گەكتار جەردىڭ جوباسى دا تانىستىرىلدى. مۇندا دا سۋ، گاز، ەلەكتر جۇيەلەرىن تارتۋ كەرەك.
 
– بارلىق اۋدان، قالادا يندۋستريالدى ايماقتاردى ءتيىمدى پايدالانۋ، جاڭا وندىرىستىك ايماقتار اشۋ وتە ماڭىزدى. وسى باعىتتا جۇمىستى كۇشەيتۋدى تاپسىرامىن. ءوندىرىس ورىندارىن، كاسىپورىندار اشۋ بويىنشا بەلسەندى جۇمىس جۇرگىزىلسىن. ينۆەستورلار تارتىڭىزدار. ءبىز ءوز تاراپىمىزدان ينۆەستيسيالىق جوبالاردى جۇزەگە اسىرۋعا قولداۋ كورسەتەمىز. بۇل رەتتە مەگاپوليسكە جاقىن ورنالاسقان ورداباسى اۋدانىنىڭ الەۋەتى وتە جوعارى، – دەدى دارحان ساتىبالدى.
 
وبلىس اكىمى اقبۇلاق اۋىلىنداعى «بادام» يندۋستريالدى ايماعىنا دا بارىپ، جەر كولەمىن 50 گەكتارعا ۇلعايتۋ جوباسىمەن تانىستى. جوعارىدا اتالعان جوبالار ىسكە اسسا، تۇركىستان وبلىسىنداعى كاسىپورىندار جانە جۇمىس ورىندارى كوبەيەدى دەگەن جوسپار بار.
ايتا كەتەيىك، 2023 جىلى تۇركىستان وبلىسىنىڭ ەكونوميكاسىنا 972 ملرد. تەڭگە تارتىلىپ، الدىڭعى جىلمەن سالىستىرعاندا 126،1%-عا ارتتى. ونىڭ ىشىندە جەكە ينۆەستيسيالار 705،1 ملرد. تەڭگە بولسا، بيۋدجەتتىك ينۆەستيسيالار – 266،9 ملرد. تەڭگە. ءوسىم ديناميكاسى بويىنشا وبلىس رەسپۋبليكادا 3-ورىندا تۇر.
 

ۇسىنىلعان
سوڭعى جاڭالىقتار