Atyraýda Qarabalinder áýletiniń ólimine qatysty atyshýly qylmystyq is boiynsha sot otyrysy bastaldy. Is boiynsha Sultan Sársemáliev aiyptalýshy retinde jaýapqa tartylyp otyr. Tergeý málimetinshe, ol qaiyn jurtynyń qazasyna qatysy baryn moiyndaǵan, dep dalanews.kz tilshisi kznews.kz saityna silteme jasap habarlaidy.
Atalǵan isti tergegen Atyraý oblysy politsiia departamenti tergeý basqarmasynyń asa mańyzdy ister jónindegi aǵa tergeýshisi Temirhan Qajymuratov sotta kúdiktiniń izi qalai anyqtalǵanyn baiandady. Onyń aitýynsha, tergeý barysynda 40-tan astam adamnan jaýap alynǵan. Olardyń arasynda marqumdardyń týystary, kórshileri jáne oqiǵaǵa qatysty málimet berýi múmkin azamattar bolǵan.
Tergeýshiniń sózinshe, bastapqyda erli-zaiypty iz-tússiz joǵalǵandar retinde tirkelgen. Osydan keiin politsiia olardyń bank esepshottaryn tekserip, aqsha qozǵalysyn, qarajattyń qaida jáne qashan jumsalǵanyn anyqtaýǵa kirisken.
"Aldymen esepshottar tekserildi. Aqsha tústi me, qai jerde jumsaldy – bári qaraldy. Sol kezde kúdikti Sársemálievtiń shotyna aqsha aýdaryp júrgeni belgili boldy. Keiin aýylǵa aparyp-ákelgen taksi júrgizýshisi anyqtaldy. Ol qarasha aiynda erli-zaiypty men balasyn jetkizgen. Qaitar jolda onyń janynda Meiramgúl Muqanǵalieva da bolǵan", – dedi Temirhan Qajymuratov.
Qazir sotta qylmystyq istiń barlyq mán-jaiy qaralyp jatyr. Tergeý tarapy bul isti asa aýyr qylmys retinde baǵalap otyr. Aiyptalýshyǵa qatysty túpkilikti sheshimdi sot shyǵarady.
