Túrkistan oblysynda Nur Otan depýtattary aýdan, qalalardy aralaidy
Jýyrda Parlament palatalarynyń birlesken otyrysy ótip, Májilis tóraǵasy Nurlan Nyǵmatýlin 7-shaqyrylymdaǵy birinshi sessiianyń jumysyn qorytyndylaǵan bolatyn. Málimet boiynsha, jyl basynan beri Parlamenttiń qos palatasynyń birlesken 3 jiyny, Májilistiń 23, Senattyń 21 plenarlyq otyrysy ótkizilgen. Qos palata depýtattary da bul sessiiada belsendi jumys atqaryp, mańyzdy Zańdar qabyldanǵan. Májilistegi depýtattyq korpýs 70 paiyzǵa jańarǵan.
Osy jáne ózge de máselelerdi sóz etken Túrkistan óńirinen sailanǵan qos depýtat 7-16 shilde aralyǵynda oblystyń aýdan, qalalaryn aralap, halyqpen júzdesetinderin jetkizdi. Máselen Qainar Abasov Ordabasy, Sozaq, Báidibek, Saryaǵash aýdandary men Kentaý jáne Túrkistan qalalaryn aralaidy. Al Syrym Ertaev Jetisai, Saryaǵash, Qazyǵurt, Tólebi, Túlkibas, Sairam jáne ózge de aýdan turǵyndarymen kezdesýdi josparlap otyr. Maqsat – eldegi kúrdeli máselelerdi anyqtaý jáne «Nur Otan» partiiasynyń «Ózgerister joly: Ár azamatqa laiyqty ómir!» sailaýaldy baǵdarlamasyn júzege asyrý barysyn saraptaý. Depýtattar osy issapary arqyly óńirdiń tynys-tirshiligin baǵdarlap, ózekti máseleler boiynsha depýtattyq saýal ázirleýdi kózdep otyr.
