بۇگىن ق ر پارلامەنتى ءماجىلىسىنىڭ دەپۋتاتتارى، «Nur Otan» فراكسياسىنىڭ مۇشەلەرى قاينار اباسوۆ پەن سىرىم ەرتايەۆ تۇركىستانعا كەلدى. ولار «Nur Otan»  پارتياسى تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى بەيسەن تاجىبايەۆپەن كەڭەس وتكىزىپ، الداعى ءىس-ساپار بارىسىن تالقىلادى، – دەپ حابارلايدى Dalanews.kz «Nur Otan» پارتياسى تۇركىستان وبلىستىق فيليالىنىڭ باسپا ءسوز قىزمەتىنە سىلتەمە جاساپ.

جۋىردا پارلامەنت پالاتالارىنىڭ بىرلەسكەن وتىرىسى ءوتىپ،  ءماجىلىس ءتوراعاسى نۇرلان نىعماتۋلين 7-شاقىرىلىمداعى ءبىرىنشى سەسسيانىڭ جۇمىسىن قورىتىندىلاعان بولاتىن. مالىمەت بويىنشا، جىل باسىنان بەرى پارلامەنتتىڭ قوس پالاتاسىنىڭ بىرلەسكەن 3 جيىنى، ءماجىلىستىڭ 23، سەناتتىڭ 21 پلەنارلىق وتىرىسى وتكىزىلگەن. قوس پالاتا دەپۋتاتتارى دا بۇل سەسسيادا بەلسەندى جۇمىس اتقارىپ، ماڭىزدى زاڭدار قابىلدانعان. ماجىلىستەگى دەپۋتاتتىق كورپۋس 70 پايىزعا جاڭارعان.

وسى جانە وزگە دە ماسەلەلەردى ءسوز ەتكەن تۇركىستان وڭىرىنەن سايلانعان قوس دەپۋتات 7-16 شىلدە ارالىعىندا وبلىستىڭ اۋدان، قالالارىن ارالاپ، حالىقپەن جۇزدەسەتىندەرىن جەتكىزدى. ماسەلەن قاينار اباسوۆ ورداباسى، سوزاق، بايدىبەك، سارىاعاش اۋداندارى مەن كەنتاۋ جانە تۇركىستان قالالارىن ارالايدى. ال سىرىم ەرتايەۆ جەتىساي، سارىاعاش، قازىعۇرت، تولەبي، تۇلكىباس، سايرام جانە وزگە دە اۋدان تۇرعىندارىمەن كەزدەسۋدى جوسپارلاپ وتىر. ماقسات – ەلدەگى كۇردەلى ماسەلەلەردى انىقتاۋ جانە «Nur Otan» پارتياسىنىڭ «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىن جۇزەگە اسىرۋ بارىسىن ساراپتاۋ. دەپۋتاتتار وسى ءىسساپارى ارقىلى ءوڭىردىڭ تىنىس-تىرشىلىگىن باعدارلاپ، وزەكتى ماسەلەلەر بويىنشا دەپۋتاتتىق ساۋال ازىرلەۋدى كوزدەپ وتىر.