Oblys ákiminiń halyqaralyq mańyzy bar joldardyń boiyn retke keltirý boiynsha tapsyrmasyna sáikes, Túrkistan-Shymkent-Saryaǵash baǵytyndaǵy kúrejol boiynda ornalasqan kásipkerlik nysandarǵa júrgizilgen zerdeleý nátijesi búgin oblys ákiminiń orynbasary Nurbol Turashbekovtiń tóraǵalyǵymen ótken jinalysta saralandy, dep habarlaidy Dalanews.kz
«Jumysshy top búgingi tańda 137 nysandy aralap, birqatar kásipkerge ǵimarattardyń sáýletine qatysty eskertý jasady. Túrkistan-Shymkent-Saryaǵash baǵytynda 33 janarmai beketi, 69 tamaqtaný orny, 8 qonaqúi, kólikke tehnikalyq qyzmet kórsetetin 27 nysan bar. 7 nysannyń ieleri jóndeý jumystaryn júrgizýge ýaqyt surasa, iesi anyqtalmaǵan 3 ǵimaratty buzý jóninde meken jaiy boiynsha aýdan ákimdikterine usynys joldandy. Ordabasy jáne Báidibek aýdandarynda ornalasqan 4 nysannyń iesi naqtylanýda», — delingen Túrkistan oblysynyń baspasóz qyzmetiniń habarlamasynda.
Birqatar nysandar Almaty-Termez tas joly jóndeýden ótken 2010 jyldan beri qyzmetin toqtatqan. Óitkeni ǵimarattar jol qorshaýynyń tysynda qalyp qoiǵan. Kásipkerler ǵimaratqa kólik burylysyna jol ashylyp, ruqsat berilgen jaǵdaida jóndeý jumystaryn júrgizip, jumys isteýge nietti ekenderin jetkizgen.
Oblys ákiminiń orynbasary dúńgirshekter men saýda qatarlary úshin biryńǵai sáýlet úlgisin usynýdy tapsyrdy. Sonymen qatar, jolaýshylardyń qajettilikterin eskere otyryp, jol boiynda kórsetiletin qyzmet túrleriniń tizbesin jumysyn qaita bastaityn kásipkerlerge usyný kerektigin atap ótti. Sonymen qatar, oblystaǵy aýdan-qala aralyq jol jiekterindegi kásipkerlik nysandardyń zańdylyǵyn zerdelep, qasbetterin retteý boiynsha tiisti tapsyrmalar berdi.
